الحقيقة انا قابلتنى مشكلة بين اتنين بيحبوا بعض وبحكم انى البنت زميلتى سألتنى ايه رأيى ولكن انا معرفتش ارد عليها واقولها ايه ودلوقتى هعرض المشكلة على حضراتكم وياريت تشاركونى فى حلها .
ولد وبنت بيحبوا من فترة كبيرة جدا وهما كانوا فى الدراسة مع بعض والولد فضل يحب البنت سنه من غير ما يصارحها وبعدين قرر ان يعترفلها بحبه ليها ولما اعترفلها انه بيحبها لقاها كمان هى بتحبه وفضلوا مع بعض فترى كبيرة لغاية ما بدات شوية مشاكل بينهم زى اى اتنين بيتخانقوا ولكن للاسف هما سمحوا لواحدة صاحبتهم انها تتدخل بينهم وتحاول تصلح الامور ولكن العكس هو اللى حصل ابتدأت البنت دى تعقد الامور ما بينهم وتحكى لكل طرف منهم انه بيقول حاجات وحشه عن التانى لحد لما المشكلة كبرت وقرروا ينهوا علاقتم مع بعض وكل واحد فيهم حاول يبدا علاقة جديدة وفعلا صاحبة المشكلة اتخطبت لواحد من قرايبها وحبيبها حاول يرتبط بواحدة تانية ولكن للاسف بعد فترة انهى علاقته بالبنت التانية لانه مش قادر يحبها وقرر انه ميرتبطش باى واحدة تانية ولما صاحبتنا سمعت الخبر ده فرحت اوى وبالصدفة شافوا بعض فى مكان معين بعد 3 سنين من الفراق وكل واحد فيهم فضل يبص على التانى بس من غير كلام والمرة دى قررت صاحبتنا هى اللى تبدا واتصلت بيه وقالتله انها مش قادرة تحب حد غيره وانها قررت تفسخ خطوبتها وقالتله حتى لو انت مرجعتليش انا برضه هفسخ خطوبتى وانا اتصلت بيك بس عشان تعرف انى عمرة ما هقدر احب حد غيرك وفعلا فسخت خطوبتها ورجعوا تانى لبعض لكن المرة دى قرر الولد انه يخطبها رسمى من اهلها وفعلا اتخطبوا لبعض ولكن المشكلة انهم وبعد حوالى 6 شهور من الخطوبة بقى بيتخانقوا كتير جدا لانهم هما الاتنين عصبيين ومشكلة الولد انه بيغير عليها جدا وهو عصبى بطريقة غريبة وهى بتقول انها ساعات بتعمل حاجات مش بتعرف هى بتعملها ليه وهو بيزعل منها كتير وبتقولى والله انه بتحبه ولكن ساعات بتعمل حاجات بتزعله كتير وهو بيزعل منها اوى واخر مرة قالها انها مش بتحبه وهى فضلت تحلفله بانها بتحبه بس مش بتقصد انها تزعله وانها مش بتعرف تعبر عن الحب بتصرفاتها وهى خايفة يضيع منها مع انها متأكدة انه بيحبها وعمره ما هيقدر يتخلى عنها بس هى خايفة ان ده يأثر على حبه ليها .
ومش عارفة تعمل ايه ؟
