انهاردة انا جبتلكم طريقة عمل سلطة "السيزر سلاد"هيا بصراحة سلطة جميلة جدا وممكن تستعملوها كانها وجبة كاملة لو زودتوا فى الكمية لانها بتحتوى على الفيتمينات والنشويات وكمان بروتين وغيرها كتير من العناصر
السلطة دى بنطلبها كتير جدا فى المطاعم مع انها سهلة جدا جدا وممكن اننا نعملها فى البيت بكل سهولة وعلى فكرة حلوة فى الرجيم كوجبة مغذية ومش بتحمل سعرات كبيرة وهتفيدكم اكيد باستثناء المايونيز منها طبعا او تستخدموا المايونيز اللايت "هكلمكم شوية عن السلطة السلطة دى اصلها ايطالى ومخترع السلطة طباخ ايطالى مكسيكى اسمه"سيزر كاردينى "علشان كدا سماها باسمه
المقادير مبدئيا عبارة عن
خس ابيض كدا وحلو اى نوع البلدى بيكون احلى
صدر فرخة مسلوقة او مشوية منزوع العضم
معلقة خل
معلقتين كبار مايونيز
معلقة زيت زيتون
فص توم مهروس
قطع خبز محمص للتزيين
الطريقة
أول حاجة نكون غاسلين الخس وبنقطعه قطع حلوة كدا وبنشوى صدر الفرخة ونقطعه مكعبات
ونعمل الصوص الى هو عبارة عن مايونيز وملح وفلفل وتوم وزيت زيتون وخل ونقلبهم ونضيفهم للسلطة ونضيف على الوش الخبز المحمص ونبرش البارميزان عليها فى الوش وبكدا تاكلوا احلى سيزر سلاد