زى ماتعودتو ... انا بحب اجيب من الآآآخر
بادور ع المعلومة من مصدرها و اجمع الموضوع كله ف حتة واحدة عشان الكل يستفيد
و الموضوع انهردة عن ازاى نفرد شعرنا بالسشوار و المكواة من غير ما نضر الشعر
عايزة اقولكم
ان ف الغرب
البنت ممكن تكوى شعرها كل يوم تقريبا و ده يبقى روتين يومى عندها
و هاتلاقوا فيديوهات ع اليوتيوب بتؤكد كلامى
و مع ذلك شعرهم مش بيبوظ
لييييييه؟؟
ده اللى هانعرفه مع بعض ان شاء الله ابتسامة
الجزء الاول من الموضوع
هاقولكم على الادوات اللى هنحتاجها
و المنتجات اللى انا باستخدمها بالاسعار
الجزء التانى
هاقولكم اسهل طريقة لفرد الشعر
الجزء التالت
نصايح و اخطاء مفيدة ليكم
يلا نبدأ
بسم الله
1- الادوات
-----------
1- شامبو
أهميته :
نظافة الشعر و فروة الراس و ازالة اى اتربة او اوساخ عالقة بها و اى زيوت او كريمات
و دول اللى بيكونوا السبب ف ريحة الشياط اللى بنشمها و بتخلى الشعر ريحته وحشة بعد المكواة
ده غير انك لما تغسليه هاتتمكنى انك تقعدى بشعرك فترة اطول لحد معاد الشاور اللى بعده
و يفضل يكون خالى من مادة الكبريتات Sulfate لانها بتكسر الشعر
و دى للاسف موجودة ف اغلب الشامبوهات اللى ف السوق ف صورة SLS=Sodium lauryl Sulfate
بس فى بعض الشامبوهات مش بتبقى موجودة فيها و دى اللى بيستخدموها اللى بيفردوا شعرهم بالكيراتين
لان الكبريتات بتبوظ الكيراتين اللى هو البروتين الاساسى المكون للشعرة
استخدمى شامبو Keratin silk protien
2- بلسم
أهميته :
بيغلف الشعرة بطبقة حماية اللى شالها الشامبو مع بقية الحاجات اللى بيشيلها
و بالتالى بيحميها من الحاجات اللى بتتعرضلها من رطوبة و اتربة و هكذا
و كمان بيقلل هيشان الشعر
و يفضل تستخدمى البلسم نفس ماركة الشامبو عشان يبقى نظام متكامل لشعرك
و بلاش الشامبو اللى ببلسم ف نفس الازازة ده
الافضل كل واحد لوحده
واستخدمى البلسم اللى ده بردو Keratin silk protien
3- واقى للشعر من الحرارة
و يمكن ده اكتر حاجة بننساها مع انه اهم حاجة
أهميته:
ده بيعمل طبقة سليكون حوالين الشعرة يحميها من الحرارة سواء السيشوار و المكواة
ده غير ان الطبقة دى بتسيح بالحرارة و بتدى مظهر لامع للشعرة حلو اوى و تخليها طرية
و ده اللى بيفرق لما بتكوى شعرك ف كوافير محترم و يرش لك منه قبل المكواة
و ف كوافير تانى مش بيهمه الشعر يبوظ و تلاقى شعرك مكملش يومين و بقى ناشف و هايش
اشهر ماركة هى TRESemmy300 مللى
بـ 65 ج من العزبى
و هتلاقى مكتوب عليه واقى من الحرارة حتى 230درجة
يعنى اعلى من حرارة المكواة كمان
4- سيروم
أهميته :
ده بتستخدمى نقطة منه بعد ما تخلصى خالص على الشعر كله بيخبى التقصف و يمنع الهيشان و يدى لمعة للشعر
و ف اى وقت بعد كده بتستخدميه بردو عادى
وبنصحك بده Cetri shine على ما افتكر كان ب70ج من العزبى
و بقاله معايا سنتين و لسة ماخلصش زى مانتو شايفين
لان كمية قليلة اوى منه بتكفى الشعر كله
5- مشط واسع لفك تشابك الشعر
لازم واسع
لان الشعر و هو مبلول بيبقى ضعيف
لو استخدمتى ضيق لفك التشابك هايتقطع منك
6- مشط ضيق
لتوزيع السبراى ع الشعر و الناحية الرفيعة دى بتساعدك ف تقسيم الشعر
7- مجموعة كليبسات او توك
عشان تمسك الشعر و احنا بنفرد مايتلخبطش ع بعضه
انا بافضل التوك اللى بتقفش
8- السيشوار و الفرشاة بتاعته
أهميته :
تجفيف الشعر لو لسة غاسلاه لان غلط استخدام المكواة على شعر مبلول
ساعتها هايبقى كأنك بتغلى شعرك مش بتكويه
فرد الشعر و ده بيسهل جدا من خطوة الكوى و يقلل فترة تعرض الشعرة لحرارة المكواة العالية
و بيستخدم على البارد بعد ما تخلصى كوى الشعر بيدى مظهر طبيعى للشعر و يمنع هيشانه
يفضل تختارى السيشوار القوى يعنى الوات بتاعه يكون عالى
عشان يديكى نتايج افضل و اسرع
انا ماعرفش اوى ايه الماركات الموجودة
بس ماركة Gek الايطالى حلوة جدا
هو 2000 وات
و أخيرا
9- المكواة
و يفضل تجيبى مكواة حديثة بتقنية السيراميك او الايونات
لانها بتوزع الحرارة بشكل افضل و بتبقى احن على الشعر من القديم
و يكون فيها اوبشنز درجات الحرارة المختلفة عشان تختارى الحرارة المناسبة لشعرك
و هاقولكم ان شاء الله كل نوع شعر ايه الحرارة المناسبة ليه