تعالى اقولك ازاى تجددى عفش بيتك ببلاش

كل ست تحب تشوف دايما بيتها احسن بيت ما بين صحبتها واخواتها وكمان حماتها وسلفاتها عندك مثلا الستاير والسجاد والانتريه وكمان المطبخ والحمام كل عاوز يتجدد
تعالى نتكلم عن حاجه حاجه اولا الستاير عندك ستاير حلوة وشيك انا معاكى تعالى بقى نحافظ عليها شويه وننزل على اى محل اتنين ونص ونشترى غيار للستاير بتاعتنا هيكلفك 60 جنيه لكل متر ونص ومتفصل وجاهز يعنى على التعليق وبكده تبقى حافظتى على ستايرك الغاليه وفى نفس الوقت مدفعتيش كتير فى الستاير الجديده واديتى شقتك لوك جديد

اما تانى حاجه تعالى ورايا على الحمام بصى بصه كده عندك ايه مش عاوزاه لمى كل اللى انتى زهقتى منه واغسليه وعبيه فى كرتونه وشيليه تحت السرير بينا على اتنين ونص نشترى طقم فرش ارضيات لحمام جديد وكمان ستاره جديده وامورة للحمام وهاتى طقم فرش السنان والمعجون ويا سلام بقى لو جبتى سله خوص امورة عشان تحطى فيها الشاور جل والشامبو وبالمرة غيرة ريحه معطر الحمام برده من باب التغيير وبكده يبقى عندك غيارين للحمام

يلا بينا بقى على الريسبشن تعالى بدل ما نشترى طقم انتريه جديد تعالى نجدد القديم باقل تكلفه اولا اذا كانت خددياته هبطانه تعالى نعليها بقطعه سفنج بنفس المقاس مش هتكلفك حاجه خدى مقاساتها وخلى المنجد يقص على مقاسها وبكده تبقى مصرفتيش فلوسك فى التنجيد اما بقى الفرش بتاع الانتريه ولونه ممكن تشترى كسوة بالالوان اللى انتى حاباها جاهزة وبرده سعرها بسيط

وتبقى كده جددتى الصالون والحمام والستاير ومصرفتيش اكتر من 400 جنيه وكمان ممكن توفرى منهم, استنينى فى باقى الشقه كلامنا لسه مخلصش