كتير مننا كان بيحلم ان يدخل هندسة وبالاخص عدد معين من الناس بتحب التحدي عايزه تدخل هندسة عين شمس تحديدا !
في الحقيقة عندكم حق تحاولو بكل جهدكم الدخول لهندسة عين شمس ,سمعة كويسة ,مستوي تعليم عالي ,اسلوب تدريس قوي وفعال ,مكان نضيف فوق المستوي خصوصا في التطوير الاخير ,ملاعب جميلة (للعلم بقت بالايجار) وحاجات كتير ....
ولكن شوية نصائح من مهندس صغير هيكون في البكالريوس السنة اللي جاية وقضي عدد سنين محترم في الكلية خد مني شوية نصائح علي الماشي
1- الكلية فحط وردم وكل اللي كان في الثانوية العامة اعتبره لعب ,واللي جي حاجة تانية خالص ,مش صعب ولكن هو اللي بخليه مكروه .
2- العامل النفسي مهم في الكلية ,حافظ علي ثبات نفسيتك والا هتدبلر وش
3- الكلية محتاج منك مجهود وخصوصا السنة العدادية في الكلية ,لازم تعرف تضع مجهود ازاي وفي الوقت المناسب
4- قبل الميد ترم هتلاقي نفسك تايه ,شئ طبيعي لانك لسه مش فاهم الدنيا مشيه ازاي ,حاول تصاحب الناس اللي اكبر منك في الدفعات علشان تفهم منهم الوضع ,وياريت يكون من الناس المتميزين ,علشان تتعدي منه
5- الميد ترم بعد 6 اسابيع من بدء الدراسة يعني علي ما تشم نفسك هيكون الميدترم وصل ,فشد حيلك بدري وذاكر اول باول .
6- ما تشغلش نفسك بموضوع المصروفات والكلام الاهبل ده لان معاك طول السنة ,تقدر تدفع في اي وقت .
6- الدراسة في اعدادي تقريبا 80% انجليزي ,متقلقش مش مشكلة حتي لو متعرفش ,هتتعلم مع الوقت ,حافظ علي ثبات نفسيتك ,لازم
7- لازم يكون ليك شعار في الكلية وهو انك لازم تتعلم !يعني انا جاي العب ؟لا بس مش كل اللي اتخرج من الكلية اتلعم شئ ,يعني في ناس بتذاكر ايام الامتحانت فقط ,وده بيبقي اخيب مهندس ,لانه مفهمش اسايات الهندسة .
8- حدد رغبتك في القسم بدري لانها علي اساسها هتحدد المستوي المبذول منك وغالبا بيكون ترتيب الاقسام ك
كهربا
عمارة
مدني
ميكانيكا
مش معني الترتيب ان في قسم احسن من قسم ,لا ده ترتيب علشان اعداد المنتسبين للقسم تكون في المستوي المناسب .لس بدري علي موضوع الاقسام ده ,في بوست تاني ان شاء الله ,خلينا في اعدادي
في الترم الاول هيكون في
رياضة (تفاضل وتكامل ) اصعب شوية من الثانوي
فيزياء
كمياء
ميكانيكا
رسم ووصفية
انتاج
سهل لو حبيته حاسبات , اسلوب برمجة خفيف
الترم التاني
خلص الاول وبعدين هتعرفهم ,هو انا لس فاكرهم
اي حد عايز يعرف حاجة يراسلني علي الميل من هنا
shmagdy(at)gmail(dot)com