سؤال غريب مش كده ؟؟
يعنى أيه أشغل عقلى ؟ وأزاى أشغله؟
كلنا فعلا عندنا عقل ربنا منحه لنا ، لكن مش كلنا بنستخدمه أحسن استخدام ده بالعكس في ناس بتتعاطى بعض الأدويه علشان تنومه شويه
على الرغم أنه المفروض يكون شغال طول الوقت علشان يسعدنا لأن ربنا ما خلقناش فى الدنيا دى علشان يعذبنا
طيب ازاى عقلى يخلينى سعيد ؟
ببساطة شديده ومن غير تعقيدات ربنا خلق فى كل واحد فينا عقل باطن لا واعى وعقل واعى مدرك "الله أنت كده معقدتناش"
طيب هبسطهالك يعنى مثلا لما تيجى تتعلم تسوق عربيه فى الأول هيبقا فى العقل الواعى ، لكن بعد فترة طويله ممكن تسوق وأنت بتتكلم فى التليفون مثلا أو غيره ده معناه أنه انتقل من عقلك الواعى إلى عقلك اللا واعى
وكذلك أى حاجه تانيه لأن عقلك اللا واعى هو مركز الإبداع اللى بيسبب لك كل نجاحات حياتك فلو أنت نقلت فكرة النجاح لعقلك اللا واعى يبقا هتنجح ، ولو أنت حطيت فى عقلك اللاواعى الخير يبقا هتعمل الخير وهكذا .....
وعلشان تقدر تنقل الفكرة من عقلك الواعى لعقلك اللا واعى فى أكتر من طريقه منها :
1- التخيل : وهو أنك تعيش الفكرة بكل تفاصيلها كأنها حقيقة وكأنه شئ أنت شايفه قدامك ، بالاضافة إلى أنك تشتغل على حلمك فعلا أو الشئ اللى أنت عايز تقنع نفسك بيه
2- طريقة العرض السينمائى :الصينين بيقولوا أن أفضل من ألف كلمة وده معناه أنك تتخيل الحقيقه فى ذهنك علشان يقدر يستوعبها العقل اللاواعى لما تدخل نفسك فى حالة استرخاء تام
3- طريقه الشكر : وهو أنك تشكر ربنا على كل حاجه أعطاهالك على كل حاجه فعلا بتحصل معاك لغايه ما يترسخ ده فى عقلك اللاواعى وأنت مثلا بتكرر دائما (الحمد لله على نعمك عليا يارب) وقتها هتطمن وتحس بالسكينة والهدوء النفسى اللى بيبعد عنك بالتدريج أى إحساس بالخوف من بكرة أو إحساس بالاحتياج والفقر وسؤال الناس
يعنى مثلا لما تقوم من النوم الصبح وتشوف كام حاجه ضيقوك يقوم يترسب فى عقلك أن اليوم ده مش يومى ، أو اليوم ده سئ وتفضل مكشر طول النهار هتلاقى بالفعل كل حاجه بتحصل فى يومك مش لذيذه والحل أنى أدخل لعقلى اللا واعى مثلا أن كل ده من قبيل الصدفه بس واستخدم الطرق اللى قلناها قبل كده علشان أقنع عقلى اللاواعى بيها وقيس على كده أى فكرة