هنا هنعرض قصة حياة واحد من الناس ااقصد واحد من الشعب المصري واظن ان كل المصريين لا يخفى عليهم هذه المراحل من العمر من اول واء واء لغاية يااالهوييي مكنش يومك وهنشوف مع بعض مراحل النمو المختلفة
يلا بينا
المرحلة الاولى ( البداية ) :
الدنيا مدربكة وناس رايحة وناس جاية وناس لابسة ابيض في ابيض اسمهم دكاترة متلمين حولين واحدة بطنها كبيرة وبتصوت وعمالة تعض في اي حد يجي جنبها في حالة اسمها ولادة
وجوزها واقف على الباب عمال يدعي انها تخلف ولد او بقينا نقول بعد التنوير الاسلامي كل الي يجيبه ربنا كويس
وبعدين يشرف المواطن المصري النونو لاول مرة للحياة ، وفي كل الدنيا العيال بتتولد تعيط لكن النونو المصري بيتولد بيعيط ويكح ويعطس واحتمال يموت من التلوث او خناقة الممرضات عليه علشان الي تاخد الحلاوة .
المرحلة التانية ( الطفولة السعيدة ) :
بتبدأ مرحلة الطفولة بعد سبع ايام من الولادة والحقيقة مش عارف ليه واشمعنى سبعة !! لغاية دلوقت معرفتش ، وبيتعمله حفلة اسمها السبوع
الواد يا عيني في الحفلة دي بيطلع عينه وبيقعد اهله يغنوله حلقاتك برجلاتك علشان يبرجلوه !!
دا غير الغربال الي بيتحط فيه الواد المسكين ويفضل يتنفض لفوووق ويتلقف - من صغر المواطن المصري وهو بيتنفض - وغير كمان الهون والدق جنب ودنه لغاية لما ودنه تصفر
ومن الملاحظ ان الطفل بيبقى في حالة ازبهلال وتتنيح ومش فاهم ايه الي بيحصل وبيقول في سرة " دا انا داخل على ايام سودة ".
المرحلة الثالثة ( ما بعد الطفولة وهي الصبية ):
يبدأ الواد لما يوصل 4او 5 سنين وبعد خناقة اهله على المدرسة الي هيدخلها ، ويتم الاستقرار على اقرب مدرسه ليه
وطبعا بعد مغامرات الواد في الحضانة فلازم يدخل مدرسة بتعرف تتعامل كويس والا ...
ويدخل الواد الابتدائية ولما يوصل سنة 5 وحاليا سنة 6 اهله يفضله يملصوه من ودانه ويقلوله انت في شهادة يااااد يا ابن ال ... ولازم تنجح والواد ياعيني يترعب وهو مش فاهم بس يترعب وخلاص من كتر ما بيشوف ابوه بيبصله بعينه الحمرة وامه عماله تقوله ذاااكر
وينجح الواد ودخل الاعدادية وبعد ما يوصل سنة 3 اعدادي
والده يبدأ في شراء ادوات التعذيب علشان الواد يذاكر علشان يدخل الثانوية العامة واه من الثانوية العامة
وبعد ما الواد اهله تعذبه في الاعدادية ويتجلد و يتحرق ويتعض ويتعلق وياخد سوفلكس خلفي من ابوه وامه تقف على الاحبال وتنط على كرشه علشان يجيب مجموع ... يحقق الواد طموح اهله ويجيب مجموع يدخله الثانوية العامة .
المرحلة الخطر ( الثانوية العامة ) :
هي مرحلة الحكرتة وتعليم الصياعة وفي نفس الوقت هي مرحلة تحديد المصير والمستقبل ؟؟!!!! ازاي متسألش
في هذه المرحلة الواد بيتعلم السجاير والمخدرات والجري ورا البنات والديسكو تيك و انواع اللبس والبناطيل الجينز الديقة او الساقطة وانواعها وازاي يفرق بين الاصلي والمضروب والافلام الوحشة والذي منه
وفيييين يبدأ يتنبه انه لازم يذاكر ويروح يقول لاهله انه لازم ياخد دروس خصوصي واهله يا عيني يكعوا دم قلبهم للدروس الخصوصية على امل الواد يطلع حاجة
والواد يضرب فلوس الدروس في جيبه علشان يخرج مع اصحابه كل اسبوع
وتيجي لحظة امتحانات اخر السنة
هششششششششششششششششش الواد بيذاكر
التلفزيون يتشال
الكمبيوتر يتقفل
التليفون يترمي في الزبالة
الجيران نخنقهم
التكاتك نولع فيها
جدران كاتمة للصوت
شبابيك مانعة للحرارة
الام تقف تعمل سندوتشات لحمة للواد علشان يتغذى وشاي ونسكافية وكابتشينو و... الخ
الاب بيقفل في كل حاجة وعمال يروح يشتري مغذيات للواد
الواد فاتح الكتاب وحاطط صورة احم احم في النص وعمال يتفرج عليها بتركيز وبعدين يبدا يذاكر لما يكون فاضل على معاد النوم 10 دقائق
ويمتحن الولاه
وتيجي لحظة النتيجة
الى هنا نكتفي بالجزء الاول والى اللقاء في الجزء الثاني ونشوف من لحظة النتيجة والتغير الي هيحصل في حياة بطل القصة
كيموتوب
مواطن مصري