كان فيه يا بلدنا يا نسّاية .. حتة بسكوتة فريسكاية
ع الشط تبعتر ضحكتها .. تفرش حدوتة و غنواية
نشوانة بسحر جلال الكون .. عشقانة جمال الصوت و اللون
هيمانة ف حلم جميل حيكون .. عنوان الأيام الجايّة
بتحب الناس و الناس ناسيين .. و بتحلم تكسي الكون فساتين
و قلوب الناس تطرح بساتين .. التينة جنب العنباية
و البنت الشمس الشموسة .. مع كل صباح تبقى عروسة
تطلع على مصر المحروسة .. فرحة بزغروتة بضحكاية
------
كان فيه يا زمان عصفور إنسان .. في الجو شريد و مالوهش مكان
و الصقر معربد و العصافير .. طايرين خايفين و الغدر جبان
بيلملم عشه عود على عود .. و بيفرش جنة للموعود
و اكمن مفيش للحب حدود .. فرحان في الروحة و في الجاية
و البت الشمس الشموسة .. مع كل صباح تبقى عروسة
تطلع على مصر المحروسة .. فرحة بزغروتة بضحكاية
كان فيه يا بلدنا يا نسّاية .. حتة بسكوتة فريسكاية
ع الشط تبعتر ضحكتها .. تفرش حدوتة و غنواية
أحمد فؤاد نجم
