السلام عليكم

كالعادة يستمر مسلسل الاهانات القذر من الامن المصري للجمهور المصري اللي رايح يتفرج علي ماتش !!
كالعادة في اي لقاء جماهيري عموما - ولقاءات الاقاليم خصوصا - نجد تعنت غير طبيعي من الامن تجاه الجمهور الحاضر فقط لمتابعة المباراة ومؤازرة فريقه وكأن ما يفعله هؤلاء هي الجريمة بعينها !!
مسئولين يوجهون تعاليمهم لافراد امن - معمولهم غسيل مخ - ينفذونها بلا اي تفكير او وعي حتي تخرج لائقة ويخرج المسئولون فرحين باستتاب الامن وعدم الخروج عن النص

ولأن الاعلاميين في بلدنا لا يهتمون الا بالفضائح بين بعضهم البعض فهم لا يقومون بتغطية ما حدث ويخرجوا جميعا ليشيدوا بدور الامن في اللقاء والذي يقتصر دوره حاليا للأسف في عدم وجود شماريخ في الملاعب اما الاهانات الانسانية والبدنية والبشرية التي تحدث للجمهور لا تهمهم في شئ ( اهم حاجة يا بيه ان ولاد ال ... بتوع الالتراس دول ما دخلوش "الصورايخ" )

دي مقدمة بس لما حدث

1- في البداية انا واحد من جمهور الاهلي كل ذنبي اني حبيت اشجع فريقي وابقي وراه وخصوصا انه بقي في بلدي وفوجئت كل ما اسأل حد من صحابي ( الاهلاوية ) هتروح الماتش يقولي لأ ليه يا عم عشان متوقع تعنت من الامن !!
2- اشتريت تذكرة وللعلم هي درجة اولي
3- رحلة في منتهي المشقة بدأت من تعنت مسئولي البترول الغريب باختيار ملعب البترول لاقامة اللقاء وهو ملعب سئ جدا جدا جدا من كل الظروف - ساذكرها لاحقا - وعدم اختيار ملعب الجامعة الذي يسع لنفس عدد الجمهور + يمتلك اضاءة ليلية + الملعب في وسط الجامعة وسط المحافظة نفسها !
4- رحلة بدأت في الثانية عشرة ظهرا اليوم في طقس تصل درجة الحرارة اليوم الي 40 علي الاقل واليوم بالذات درجة الرطوبة كانت عالية جدا !

5- ركبنا تاكسي والتاكسي وقف في 4 نقاط تفتيش وفي كل مرة ننزل نتفتش ، وفي اخر مرة اخدوا كل زجاجات المياه وقالوا لنا اشربوها او ارموها !! وللعلم لا يوجد اي مصدر يمكن ان تشتري منه اي مصدر مياه في الاستاد او حتي حمام ! 6- وصلنا الي مدخل شركة البترول وكان في طريقين واحد منهم يدخل للشركة من ورا والتاني من البوابة الرئيسية - اللي دخلت منها عادي جدا السنة اللي فاتت - ، نفاجئ ان الامن بيقولنا ادخلوا من البوابة التانية
7- وصف البوابة التانية انها في قرية !!
بوابة تقع في طريق طوله 400 متر تقريبا ممنوع فيه دخول الاتوبيسات او التاكسيات - الا المتوصي عليهم طبعا بواسطة - وب التاكسي نزلنا ومشينا المسافة دي لحد ما وصلنا
وكانت الساعة 12.45
8- وصلنا البوابة وفوجئنا
كم رهيب جدا جدا جدا من الجماهير واقفين في الانتظار والبوابة عرضها يسمح بمرور اتوبيس بالكاد والالعن ان جزء صغير جدا منها اللي بيسمح بمرور شخص واحد هو اللي مفتوح والناس بتدخل منه
مهزلة من مسئولين المباراة اللي طبعوا تذاكر اكتر بكتيييييير من سعة الاستاد وكان في الاف ما دخلوش الماتش والاستاد جوه مليان علي اخره !!

9- فضلنا في الانتظار من 12.45 لحد 3.30 واقفين والجو كله شمس وللعلم الطريق اللي فيه البوابة هو طريق داخل قرية وب الطريق مش مرصوف وكله تراب ولكم ان تتخيلوا 30 الف متكتلين في مكان ضيق جدا جدا جدا وكله تراب والرؤية هتبقي ازاي ساعتها !! من 12.45 ل 3.30 شوفنا كل انواع الاهانات اللي ممكن حد يشوفها :
1- العساكر كل ما مسئول في عربية - مكيفة طبعا - يدخل يقوم ضارب الناس بالعصي ومفرقهم عشان البيه يعرف يدخل البوابة مرتاح !
2- العساكر منتهي السفالة وقلة الادب مع الجماهير وكل ما حد يكلمهم يكون الرد "ان ما اتلميتوش هنلمكوا بدي - وبيشاور علي العصاية - "
3- واقفين في 9 طوابير بالعرض والطوابير التسعة لازقين في بعض بشكل صعب جدا جدا والظابط ولا اللوا ولا العقيد ولا ايا كان اللي ماسك الموضوع مش محدد اصلا هو عايز ايه مرة يقول اقفوا في طابور ومرة يقول تعالوا يمين لا لا تعالوا شمال !! وكل ده في عز الحر والتراب الرهيب والزحمة وضرب العساكر لينا !!
4- في الساعة 3.30 اكتر من الف واحد معاهم تذاكر - منهم اكتر من 50 واحد درجة اولي - وكان في واحد حاجز مقصورة كل دول اتقفل الباب في وشهم واتمنعوا من الدخول !!

استاد البترول :
1- استاد سئ جدا جدا كبناء
2- موجود في قلب الصحرا - علي بعد 20 كم من مدينة اسيوط نفسها -
3- ارضية ملعب سيئة جدا جدا جدا
4- الاستاد جنبيه قرية ومقابر
5- المسئولين عن الاستاد في منتهي التخلف وسوء التنظيم من حيث عدد التذاكر وتنظيم الدخول

دي بعض الصور


جزء من معاناة الجمهور في الحر والتراب والزحام وعدم النظام !





بالله عليكم ده منظر جنب بوابة استاد رياضي !! ؟





قرية البترول ( ستاد البترول سابقا )


!!!


بوكس بيدخل براحته طبعا انما احنا نتشوي ولا حد يسأل !!



ده اتوبيس الالتراس في دخولهم

لقطة من تجمهر الامن ادام الجمهور اللي بيسعي لدخول البوابة
ونلاحظ في دي ان البوابة الكبيرة ليها بوابة صغيرة علي الشمال دي اللي الناس بتدخل منها علي فكرة بمعدل واحد في البوابة !!








صور بعد ما الماتش بدأ ومعظم الناس يئست بعد ما البوابة قفلت ( 3.30 )

في الفيديو ده واحد بيه ( لواء بقي ولا عميد ولا عقيد ) قاعد في عربيته مرتاح يدخل براحته الاستاد من غير قيد او شرط واحنا الجمهور نتسلق في عز الشمس !!
وللعلم الموقف ده اتكرر كتير قوي النهارده بس ده الوحيد اللي صورته

الخلاصة
1- الموضوع ده لتوضيح ما حدث من الامن للجمهور في مباراة بترول اسيوط + سوء التنظيم ب"غباء" من مسئولي بترول اسيوط
2- الموضوع ده مش اثبات ان اللي حصل ده حالة خاصة انا عارف انه بيحصل في كل الاستادات تقريبا
3- مطلوب في الموضوع ده تجميع صور وفيديوهات لمهازل الامن مع الجمهور في القاهرة واسكندرية وبورسعيد واسماعيلية والمحلة والمنصورة
4- يا ريت الاعلام ما يشتكيش بعد كده من خلو المدرجات من الجماهير
اللي اعرفه انه لما يكون عندك سلعة بتحاول تسوقها بكل ما تملك انما دي السلعة الوحيدة اللي بيتم التنفير منها !!

صور الامن وهو بيعتدي علي الجمهور