طبعا يا عيني دايما البنات كالعادة تفضل تقول
" بيفرقوا بينا في المعاملة انا واخويا وااااء وااااء !!!! "
طيب تعالوا نشوف كدا مع بعض التفرقة بتبقى ازاي ؟
لما البيبي بيتولد بنشوف معاملة الناس ليهم وعلى مر المراحل بالشكل دا :
البنت بيتقالها :
يا خلاسي على الجمال ، ايه الحلاوة دي ، شبة مامتها ، امورة ، ربنا يخلي ، لبسوها خرزة زرقا
دا غير الحلقان والسلاسل الدهب والفلوس الي بتنزل عليها ترف
الولد بيتقاله :ايه الوحاشة دي ، طالع لجدو ربنا يرحمه ، هو اقرع ليه ؟ ، خد بالك منه علشان مينحرفش ، مناخيرة مبعجرة
وطبعا لا في دهب ولا فلوس واخره بزازه معفنة يفضل يعضعض فيها
مرحلة ما بعد الطفولة :
البنت :
نفسك في ايه يا كتكوتة ، ايه العسل دا ، خدي يا حبيبتي اشتري لوليتا ، بابا مبسوط منك علشان بتذاكري ، عسولة
دا غير الدولاب الي مليان فساتين وجيبات اشي بينك واشي فوشيا .... واشي اكسسوارات ودلع وعرايس لعبة
الولد :
نقطنا بسكاتك يلاه ، يا ابني انت مش لسه واخد جنية ، خد ياد اشتريلي علبة سجاير ، ايه الواد المتشرد دا، بابا مخنوق منك ولما يرجع هيقطع الشبشب عليك علشان قالك متنزلش ونزلت
دا غير الدولاب الي مليان تيشرتات مقطعة وشورتات مفلوقة من كتر لعب الكورة
مرحلة الشباب :
البنت :
كبرتي وبقيتي عروسة ، خدي يا حبيبتي اشتريلك حاجة علشان متبقيش قليلة في وسط اصحابك ، ايه العسل دا ، موزة ، هز يا وز ، يا غزال ، ايه الجمال دا ، ايه الرقة دي ، تتجوزيني يا حياتي ، ؟
دا غير الدولاب المليان تونيكات وبرفنات وباديهات واشربات يفتحوا محل
دا غير المعاكسات الي في الشارع وهي بس تشاور لميكروباص او تاكسي دا اذا باباها مجبلهاش عربية
الولد :
كبرت ولسه اهبل ، لسه بتمد ايدك وبتقول هات مش مكسوف على نفسك ؟ ، الاجرة يا كابتن - دا اذا الميكروباص وقفله اصلا - ، عايز عربية يا روح ... على ايه على فلاحتك اوي ؟
روحت الجامعة النهاردا يا حيلتها ؟ ، فاشل ، تعالى قابلني لو فلحت ، بتعاكس بنت الجيران طيب تعالى بقى نحلقلك ظلبطة
دا غير الدولاب الي معشش فيه العنكبوت ومفيهوش غير بنطلون جينز وتي شيرت مهربد
ولما يجي يركب يقف في الشمس لغاية لما الجيل الي على شعره يتحرق بشعره ومفيش حاجة عايزة تقفله
مرحلة ما بعد الشباب :
البنت :
اامري يا مدام ، تحت امرك يا استاذة ، ونعم الاحترام ، ايه الشياكة دي
دا غير الدولاب الي مليان فساتين وجزم وشنط و كريمات ومكياجات
الولد :
الفلوس الي عليك يا عم ، هتروح مني فين ، اقف في الطابور يا استاذ ، انت شايل الهم ليه مفيهاش حاجة القبض اتأخر ، ايه يا عم نفس القميص والبنطلون طول السنة ؟
طبعا مفيش دولاب اصلا ويا دوب مسمارين على الحيطة يعلق الي حيلته عليهم
مرحلة كبار السن :
البنت :
رضاكي علينا يا حجة ، ست بركة ، ابوس ايدك يا ماما ترضي عني ، مقدرش ازعلك الجنة تحت رجلك ، ايه النور دا ، مهما كبرتي مش بيبان عليكي
الولد :
كبرت وخرفت ، ايه يا عم الحج مالك ؟ ، العضمة كبرت ، بقيت خرع يا راجل ؟ بقيت رجل جوة ورجل برة ، عاش محروم وهيموت مشموم
وبكدا نعرف ان فيه تفرقة فعلا
موضوع شبة مقتبس
كيموتوب
