لم يمتلىء المقهى فى تاريخه بهذا الكم من الزمالكاوية الذين حضروا بكثافة عددية تقارب الاهلاوية وبثقة متناهية فى الفوز نتيجة لسيول التصريحات الزمالكاوية التى انهالت على مصر من كل من ينتمى الى النادى الابيض بداية من " أوعد جماهير الزمالك ببطولة هذا الموسم" ، " الزمالك بطل الدورى الحقيقى وبطل الكأس هدا العام" ، "وتعاهدنا على الفوز بالكأس لنهديه الى جماهير الزمالك الوفية" ، "سأمزق شباك الاهلى" ، " المباراة حياة أو موت" وكانت مناقشات الزمالكاوية قبل المباراة منصبة على كم الاهداف ومن سيحرزها؟ ولم يساورهم أدنى شك أو أى احتمال آخر واستقر الجميع قبل المباراة بانها بداية كتابة لتاريخ جديد ينتهى فيه الاهلى ويبدأ فيه الزمالك بمرحلة من التفوق تعيد للجميع مدرسة الفن والهندسة واتفق معظم الزمالكاوية على نتيجة 3 أهداف على الاقل هو مايرضيهم ، ومع الثانية 49 أحرز الزمالك هدفه الاول مما أكد هذه الحالة والثقة فى الفوز بال 3 ... لا محالة ، وقبل نهاية المباراة بدقائق التفت الاهلاوية فلم يجدوا أى زمالكاوى فى المقهى وان كان آخرهم فى "الهروب الكبير" هو قائدهم "صابر الغلبان".
عبده بركان راقصا: ايه اللى أنا شايفه ده؟ ايه اللى بيحصل ده؟
السيدبرهان: الطبيعى يابركان... مافيش جديد
عبده بركان: مع احترامى يابرهان... اللى حصل ده مش طبيعى .. أنا كنت فاقد الامل اننا نكسب من غير فتحى ومتعب
السيد برهان: طبعا فتحى ومتعب فرقة لوحدها لكن الاهلى عمره مااعتمد على لاعب ، الاهلى فريق النجوم وليس النجم الاوحد
عبده بركان: بس انت أكثر واحد عارف قيمة متعب وخصوصا آخر ماتش معاهم
سيد برهان: ده صحيح لكن برضه فيه بركات وابوتريكة وأحمد حسن وفضل وأى واحد فيهم يقوم بالزمالك وأهم عملوها النجوم
عبده بركان: والباقى؟
سيد برهان: الباقى شموس وكواكب
عبده بركان: مين نجم المباراة فى رأيك يابرهان؟
السيد برهان: الحسامين!
عبده بركان:حسام البدرى وحسام حسن؟؟؟
السيد برهان: على رأى محمد هنيدى .... ده طلع عبيط يا خالتى!
عبده بركان: اتكلم جد.... مين؟
السيد برهان: حسام البدرى وحسام عاشور
هنا قطع حديثهما شاعر الربابة وهو يغنى قائلا: عمال بيبكى وكأنه للحزن هاوى.... وبيحكى دايما عن النكد حكاوى.. قلت اسأل على السبب .... عرفت ان الحلو زملكاوى!
هنا أكمل بركان على نفس اللحن: "و نرجع ونقول ... لمركز شباب الزمالك المعقول... متأسفين يا زملكاوية ... نفذ رصيدكم فى المرحلة دية"
هنا انفجر برهان من الضحك بعدما سمع الموال من شاعر الربابة واستكمله الشاعر بركان واستلم برهان رسالة على تليفونه المحمول فدخل فى هيستيريا ضاحكا: اسمعوا الرسالة دى
فقال الجميع فى صوت واحد: "سمعنا يابرهان"
فقال برهان: واحد زمالكاوى طلع له عفريت الفانوس السحرى وقال له شبيك لبيك عبدك و بين ايديك .. قال له الزمالكاوى عاوز أشوف المرحوم أبويا فقال له العفريت .. طلب صعب جدا... اطلب حاجة تانية .. قال الزمالكاوى عايزين نفوز على الاهلى... فقال له العفريت ... انت أبوك اسمه ايه؟
واستمر الضحك وهيستيريا الفرح
بركان: انت غريب أوى يابرهان.. شكلك مبسوط أوى النهارده.. أكتر من العادى... اشمعنى؟
برهان: أولا ده تأكيد ان الاهلى أصبح حالة مستعصية على الجميع
ثانيا ده تأكيد ان كتر الكلام مالوش فايدة ومبيهزش الاهلى
ثالثا ده تأكيد لسياسة الاهلى الصحيحة فى الاعتماد على البدرى وسياسة الاحلال والتجديد مع اللاعبين
رابعا ده رد على كل مدعى ومنافق وجاهل بيتكلم على عواجيز الاهلى ووجوب اعتزالهم.. مين العواجيز دلوقتى؟ مين اللى لازم يعتزل؟
خامسا ابوتريكة جاب رقم متعب القياسى (10 أهداف) فى مرمى الزمالك وعاد من تانى
سادسا المباراة دى تأكيد على سيادة الاهلى على الزمالك فى الكاس لان الزمالك لم يفوز على الاهلى فى الكاس من يوم24 أبريل 1959... تخيل؟ وبرضه لسه بيتكلموا!
بركان: ليه الزمالك مايقلبش الفرقة الى شركة انتاج سينمائى؟
برهان: ازاى؟
بركان: ينتجوا أفلام يكسبوا منها ويسددوا ديون فريق الكرة اللى عمره مابيكسب
برهان: أفلام ايه يعنى؟
بركان: "مدرسة الفن والهندسة".. فيلم تاريخى... "الزمالك راجع تانى"... فيلم خيالى..... "الاهلى وعبد الواحد ".... فيلم رعب... "التوأم"..... فيلم كوميدى....... "وحشتنى ياأوسه".... فيلم عاطفى.... "ماتش كاس 2010"...... فيلم للكبار فقط
برهان: أنا رايى احنا اللى نعمل مسرحية......
بركان: مسرحية ايه بقى؟
برهان: انتهى الدرس ياغبى