" مصر يا بلد الخير..ياشق ظلام الليل ...يانور الدنيا ياخير ..يااحلى نسمة هوى
يااحلى قطرة ندى....يااغلى دمعه فتى
اهديكي بأية؟ اعملك اية؟
ياامى التانية يابعد الغاليه
اوصفك ازاى ؟ ومن فين اوصفك؟
من شمالك , من جنوبك , من شرقك , من غربك , من قلبك
يا وردا مفتحه حمرا ومزهزها يا جنينه مروقه
فيكى الازرق لون بحارك , الاخضر لون زراعك ,الاصفر لون ترابك , البنى لون تراثك , الابيض لون عمرانك
يااحلى بلد شفتها من بعد الدنيا دى كلها
يا كل شبر فى ارضك معادن ومتوزعه "
الكلام ده كتبته وانا عندى 11 سنة. كنت فاولى اعدادى يعنى نونة خالص
ماكنتش اعرف ايه مصر دى . خصوصا انى مولودة خارج مصر وعشت كتييييييييير من عمرى خارجها
بصراحه , كنت بحس بعار انى مصرية . ماكنتش بتكلم مصري فى المدرسه ولا اى حد كنت بخليه يعرف انى مصرية . كأنه سر حقير . وعرفت امثل الدور ده جدا لدرجه انهم كانو بيحسبونى تركيه
ماكنتش باجى مصر الا شهر كل سنتين او تلاتة . كنت بحس بغربه وانا فمصر ودة طبيعى جدا
بعد سنين كتير رجعت مصر ويارتنى مارجعت
كنت بكرهه مصر واللى فيها
بس بمرور الوقت والاحداث اللى غيرتنى مش بس حبيت مصر انا عشقتها
وبقيت بكتب فيها شعر وكلام اكبر من سنى كتييير
دلوقتى لما برجع للمكان اللى كنت فيه,,,,,,,,,
والله العظيم اليوم هناك بيعدى سنة
.................انا اسفه انى ازعجتكم بالقصة دى كلها بس انا عاوزة اوصلكم حاجه
كلنا بنحب مصر واللى يقول كده يبقي بيضحك على نفسة
لان دى غريزة جوانا
انا بلاحظ كتير ان معظم الاعضاء هنا فى المنتدى كاتبين عند البلد " للاسف مصر"
ليه كدة؟؟!! علشان اتظلمت منها مرة .......مرتين ......... تلاته
طيب انا والله العظيم ياما اتظلمت منها وشفت ايام سودا بس برده بحبها
وفعلا هى مليانة ظلم ...دى حقيقه . بس دى بلدك . ادتلك كتير . دورك بقي انك تديلها وتستحملها شويتين
طيب انا هسأل سؤال
لما والدك يزعق معاك جامد ويضربك ويحرمك من المصروف فترة
بتعمل اية؟ بتكرهه؟ بتسيبلة البيت وتمشي ؟؟ .............ماظنش
والدك بيعمل كده علشان خايف عليك وبيحبك وعايز مصلحتك وعايزك تبقى احسن واحد فى الدنيا
وانت بتكون عارف كده بس بتزعل منة وبتقول انة بيكرهك فى لحظة غضبك
بس الكلام ده مش بيكون من قلبك
بصراحه فى كلام وافكار كتيرة كنت عايزة اتكلم فيها بس انا مش عايزة اطول عليكم
والكلام ده كلة مقدمة لسؤال " بتحب مصر ولا مش بتحبها؟ ولية ؟