انا عضو جديد على المنتدى واحب تكون مشاركتي معاكم مشاركة على الاقل تكون بتبين وجهة نظر محترمة واحب اني الاقي ردود على موضوعاتي واحب تتناقشو معايا حتى لو اختلفتو انا احب المناقشة والاختلاف ما دام في شكل محترم وفي اطار موضوعي
انا ساكن في شبرا مصر في اغاخان يعني المظلات يعتبر, المنطقة اللي ساكن فيها تعتبر الى حد ما حي راقي في شبرا من بعد الثورة وبعد حالة الانفلات الامني الرهيب اللي بتمر بيها مصر اليومين دول بنواجه مشكلة في منتهى الصعوبة وهيا مشكلة الميكروباصات وسواقين الميكروباص ، كم رهيب من الالفاظ والشتايم والتحرشات والمعاكسات وباسلوب قمة في الابتذال ناهيك عن الخناقات والاسلحة العجيبة البيضة اللي بتظهر ساعة الخناقات وفيه اهالي بتنضر وبتتبهدل وخدش الحياء لبنات الشارع والاطفال.
فيه بنات وسيلة مواصلاتها الوحيدة وهيا رايحة مشاويرها او كليتها او مدرستها الميكروباص ،البنت من دول تركب الميكروباص لحد ما توصل المكان اللي هيا عاوزاه وهيا مرعوبة وخايفة من اي شئ ممكن يحصل يعني حاجة بقت في منتهى الملل والزهق بجد مبقاش حد امن على نفسه ولا على اهل بيته حتى في وسائل المواصلات.
كل ده كوم واستغلال السواقين للانفلات الامني اسوأ استغلال اي شارع عمومي دلوقتي ممكن تلاقي فيه 10 و12 ميركروباص واقفين بيحملو ويا ويله يا سواد ليله اي حد يفكر بس انه يقوله انت واقف كدة غلط وكدة مينفعش تبقى ليلته سودة وسواقين الميكروباص ينزلو فيه ضرب لحد ما يبانله اصحاب
مكان شغلي بقى انا شغال مع والدي في تجارة الادوات الصحية وعندنا محل تجاري في شارع من شوارع شبرا الخيمة ومنطقة شبرا الخيمة دي غنية بعدد لا يحصى من التوك توك حاجة مش ممكن انا في رايي ان التوك توك ده من اسوأ وسائل المواصلات اللي ظهرت في مصر مشاكله كتير جدا جدا معدلات الجريمة زادت بصورة مذرية بسبب التوك توك وخصوصا حوادث الاغتصاب ده غير الحوادث الكتير اللي بيسببها التوك توك حاجة صغيرة كدة وملهاش لزمة بتعمل بلاوي سودة في شوارع البلد قال يعني هيا كانت ناقصاهم يعني الدنيا زحمة طبيعي نازلين يزحموها زيادة بالتوك توك وخصوصا بعد حالة الانفلات الامني اللي حصلت في البلد التوك توك بقى بينزل شوارع رئيسية انا شفت كذا واحد في وسط البلد وشارع جامعة الدول تخيلو وسط البلد بالزمة دي مش حاجة تحرق الدم وتلاقي سواقين التوك توك دول من كل الفئات بس الفئة الاكبر منها فئة البلطجية ناهيك بقى عن التحرشات والمعاكسات الكتيرة اللي بتحصل والسفالة وقلة الادب والالفاظ والخناقات ،كل ده كوم وحالة التلوث السمعي اللي بيسببه التوك توك والاغاني العجيبة اللي بتشتغل وبصوت عالي جدا
انا مش ضد التوك توك ومنكرش انه ساعات بيحل ازمة بس ياريت الموضوع يتحجم شوية مش كل واحد معاه قرشين يقول التوك توك مشروع يكسب دهب ويروح يشتري واحد ويشغله انا في رايي ان مكانه في القرى والمراكز الصغير لكن مينفعش يشتغل في القاهرة خالص ولو هيشتغل في القاهرة يبقى فيه شروط وقواعد تحكمه عشان نترحم من بلاويه.
انا اسف انا عارف اني طولت عليكم بس باختصار انا عاوز اقول ان الميكروباصات والتوك توك في رايي انها بمثابة قنبلة موقوتة في البلد وسبب بلاوي كتير وكوارث بتحصل في مصر ولازم يكون ليها رابط وظابط مينفعش تتساب كدة لازم يكون ليها حل بجد لازم وزارة النقل والداخلية يقعدو مع بعض ويدورو على حل حاسم للموضوع ده عشان الأمان يرجع لينا تاني والبنت اللي بتركب الميكروباص متبقاش خايفة وهيا راكباه
اتمنى ان كل اللي يقرا موضوعي يرد عليا ويكون عنده حل للموضوع ده جايز اقتراحاتنا هيا اللي ممكن تحل او تقدم بذرة فكرة تحمينا من قرف التوك توك والميكروباص
تاني مرة انا اسف للاطالة واتمنى اني اكون قدمت موضوع مهم يحوز اعجابكم