كتب/على سلامة
21/ 4/ 2010
كان فيه ناس
لما تتكلم..
لازم نسمع
ونفهم
ونتعلم..
ونستمتع
ونتثقف..
عشان لو فى يوم
الحزن قابلنا
نعرف نتصرف..
ولو صادفنا عجوز
قلبه لسه بيدق
مانقولش عليه
الراجل ده كبر خلاص
وبيخرف..
مين اللى
هدم البيوت الجميلة
وجرف الأرض..
وماخلاش عليها
ولا حاجة تفرح
وتشرف..
عارف
لما الواد ابنى بعتلى رسالة
ع الفيس بوك
بابا
أضافتك كصديق
لو سمحت وافق
دى صورتى
وده اسمى
وأنا ابنك بجد..
ساعتها بس عرفت
إننا صحيح عايشين فى بيت واحد
لكن محدش فينا شايف حد..
وبعد السنين دى كلها
لسه محتاجين
نبص ف عيون بعض..
ومن تانى نتعرف..