حسام حسن واسباب صعوده بفريق الزمالك:
حسام حسن بث روح المنافسة والغيرة في لاعبي الزمالك الذين كان يفتقدونها من زمن قام بتصعيد عدد جيد من الناشئين واعطاهم الفرصة واثبتوا جدارتهم وقام بعمل منافسة جيدة ولم يعد هناك اساسي او احتياطي في الفريق
ولكن ماهي اسباب هبوط مستوى الزمالك وتدني المستوى ولياقة لاعبيه انا كمشجع ولاعب كرة قدم سابق في مركز الليبرو والمساك اقول:
حسام حسن لا يهتم بالدفاع مطلقاً علشان بيلعب 4 4 2 بإتنين مساكين محمود فتح الله وعمرو الصفتي
محمود فتح: الذي يتسم بالهدوء وحسن التوقع والطول و حسن بداية الهجمة ولكن يعيبه البطئ ضعيف في الإلتحامات دايماً بيقابل وهو بيرجع على ورا مش بيضغط ودة رأي الشخصي ان محمود فتح لا يصلح الا لمركز الليبرو لأن مميزاته تنفع لهذا المركز وطغتي عيوبه في مركز المساك كما كان يلعب مع غزل المحلة.
عمرو الصفتي: لاعب يتسم بالإندفاع البدني وقوة الإلتحامات والروح العالية والضغط القوي على الخصم ولكن يفتقد لميزة مهمة وهي حسن التوقع والتقدير ودائماً مايلعب على جسم اللاعب ولا يلعب على الكرة وبنيته الجسمانية ليست بالقوة والطول الكافي لمركز المساك.
المساكين ياسادة لابد ان يتميزوا بالقوة وسرعة الانقضاض والبنية الجسدية وضربات الرأس والالتحامات القوية واللعب على الكرة وليس جسد اللاعبين وانا بيعجبني من المساكين العرب بوقرة الجزائري نموذج للمساك قوي بنية جسدية محترمة سريع بيلعب على الكرة وليس جسد اللاعب يجيد ضربات الرأس ووائل جمعة زمان قبل 3 سنين وانتا نازل
من السابق يتضح ان المساكين واحد مساك على ما تفرج وواحد مش مركزه مساك + انه بيلعب بإتنين فقط.
حسام حسن والباك اليمين- احمد غانم وعمر جابر وحازم امام واحمد سمير:
احمد غانم:كباك يمين يمتاز بالسرعة والانطلاقات وقوة الانقضاض ولكن على حساب التعقل فدائماً اجده يهرول وراء الكرة بدون اي تفكير ولا احساس بالمكان يعني ممكن لاعب خط الوسط المدافع بتاع نادي الزمالك يكون رايح يقابل المهاجم او الجناح الخصم وهيقطع الكرة خلاص تلاقي احمد غانم داخل شايل لاعب الزمالك باللاعب الخصم بالكرة بالكل كليلة "ماكو مخ" على رأي الاخوة الخليجين وكان مصمم عليه حسام حسن لولا دعاء الجماهير وكلنا شوفنا بركات قد ايه كان عايش على قفا غانم لما كان بيتنقل للجناح الأيسر علشان يلعب عليه.
حازم امام : لاعب حواري اصلي بيجري بالكرة وبيرقص وهو اخر واحد ولا في دماغه مع ان في لاعب جنبه ولكن العيب مش عليه العيب على اللي لعبه في المكان دة وحتى لما بيلعب جناح ايمن نفس الكلام لعب حواري مافي اي عرضيات
احمد سمير: لاعب يمتاز بالخبرة والتقل في الملعب بيلعب بدماغه ولكن يعيبه الاصابات والزمالك محتاج خبرته دلوقتي
عمر جابر: ماشاء الله عليه من احسن لاعبي الزمالك ولد ممتاز مع قلة حجمه الا انه سريع خفيف بيجيد المرواغة والتسديد بيلعب بدماغه اكثر من اي شيئ بيبذل مجهود غير عادي في الدفاع لأن الجناح اليمين معاه ( شيكابالا او محمد ابراهيم ) مش بيرجع يدافع كمان بيبني هجمات كويس وبيعرف يخترق ويعمل عرضيات ويعمل وان توهات ويجيد في خط الوسط لاعيب فاهم كورة.
حسام حسن والباك الشمال- محمد عبدالشافي - صبري رحيل:
عبدالشافي : لاجدال من افضل لاعبي الزمالك لاعب بيجيد الطغتية في 4 4 2 بيجيد الهجوم والمراوغة والعرضيات والتسديد لكن عبدالشافي يعاني يعاني يعاني الأمرين من شيئ اسمه حسين ياسر المحمدي (الجناح الأيسر للزمالك) لأن حسين ياسر بيلعب في فريق الزمالك فقط مع نفسه عمري ماشفته بيرفع كورة من الجناح الايسر عمري ماشفته بيباصي لحد الا لما يتزنق لازم يرواغ لغاية اما تنقطع الكورة وتترد على الزمالك هجمة مرتدة وعبدالشافي يلبس وكلنا شوفنا جول الشرطة الاول ازاي بيرواغ 3 لاعيبة للشرطة وجنبه خمسين واحد واتقطع وجت جول علينا فاأنا اعتقد ان عبدالشافي بيدافع ويهاجم لوحده في الجانب الايسر
رحيل: لاعب صاعد كان مفروض حسام يديله وخصوصاً في الماتشات المحسومة للزمالك علشان يجهز بديل للظروف بس ياريت مايلعبوش خط وسط مدافع زي ماتش الاهلي لما لعب مكان ابراهيم صلاح لأنه باك شمال فقط بلاش هجس ياحسام.
حسام حسن وخط الوسط المدافع: هاني سعيد - ابراهيم صلاح - حسن مصطفى - عاشور الادهم
هاني سعيد لاعب يمتاز بالعقل وبناء الهجمة الصحيحة وحسن التسليم والتسلم لكن يعيبه البطئ الشديد عدم على الخصم والكسل بالملعب.
ابراهيم صلاح: لاعب سريع يمتاز بقوة الالتحامات لكن بدون تعقل واندفاع قوي حسام عاشور ملك خط وسط المدافع يمتاز بحسن استخلاص الكرة وقطعها زي مكاليلي كدة لكن عاشور في صناعة الهجمة مش حسام غالي.
عاشور الادهم : بيلعب على جسم اللاعبين اكثر من الكرة
حسن مصطفى : يمتاز بالغل في الملعب والزيادة الهجومية واخره شوط لأنه بيشطب لكن يعيبه الخشونة الزايدة وسوء انهاء الهجمة.
من الاخر هذا المركز من اهم مراكز الملعب وهو خط الدفاع الأقوى امام المدافعين وهو نقطة ضعف في الزمالك مع المساكين وخصوصاً لقلة عددهم وبالأخص في الشوط الثاني لأنهم بيبذلوا مجهود كبير بالشوط الاول وبيتحملوا الدفاع لوحدهم وامكانيتهم لا تؤهلهم
كدة خلاص خلصنا الدفاع ومن الاخر كدة اللي كويس فيهم : عبدالواحد السيد - فتح الله كاليبرو فقط وليس مساك - عمر جابر - احمد سمير - عبدالشافي - رحيل لو يلعب او ياخد فرصة -خط وسط المدافع مش مالي عيني فيهم حد من الاخر كدة.
هتكلم الأول عن مفهوم لاعب الجناح او لاعب الطرف المهاجم ومهامه واهميته هو اهم مركز هجومي في الفريق هو المحرك هو صانع العرضيات والاختراقات في العمق عن طريق المرواغة والتمريرات البينية الون توهات لازم يكون الجناح لاعب سريع مهاري بيرفع كويس بيباصي ويبني هجمات مع زمايله الباك وخط وسط المهاجم والمدافع والمهاجمين كمان لازم يلعب الكرة العرضية بسرعة علشان المدافعين بيكونوا في الهجمة جايين بوشهم لجولهم ولازم يستفيد من كدة بلعب الكرة العرضية بسرعة قبل اما يتمركز المدافعين صح كما لازم يتميز بالإنطلاقات والمرواغة افضل من يشغل هذا المكان في مصر بركات عيدعبدالملك وشيكابالا وكريستيانو رونالدو ههههههههه
حسام حسن والجناح الأيمن او الرواق الأيمن - شيكابالا - حازم امام - محمد ابراهيم:
شيكابالا: ماينفعش غير جناح فقط لأنه لازم يجي من الخلف للأمام بسرعته ويهرب في مساحة لكن يجب ان يعتني بلعب العرضيات بسرعة لكن الغريب ان حسام حسن بيلعبه في مركز رأس الحربة الثاني او تحت رؤوس الحربة في الفترة الاخيرة ودة بيفقد خطورته لأنه بيرتمي في حضن المدافعين وبيسهل مهامهم في قطع الكرة منه وبيقد ميزته وهي القدوم من الخلف للأمام في مساحة حسام حسن بقى ليه فكره العجيب.
حازم امام لاعب الحواري كجناح ايمن لا يصلح لابد من رفع الكرة بسرعة وبناء الون توهات مع خط الهجوم والعرضيات المتقنة ولا اجد اي شيئ من اللي قولته فيه
محمد ابراهيم: لا يمتاز بسرعة الانطلاق او اللعب على الاطراف اطلاقاً لكنه لاعب دايرة ممتاز تحت رؤوس الحربة يجيد الوقوف على الكرة والاستلام تحت ضغط والوقوف على الكرة ولعب البينيات الماكرة بس مش عارف او اموت واعرف ليه حسام حسن بيلعبه في الجناح ويلعب شيكا ورا رؤوس الحربة او راس حربة تاني ليه عاكس امكانهم مع انهم هما مفاتيح الزمالك المهارية بس لو لعب كل منهم بمكانه الصحيح
حسام حسن والجناح الأيسر او الرواق الايسر - حسين ياسر - علاء علي:
حسين ياسر: ماذا اقول عنك ياجوزيه انتا فعلاً مدرب عالمي واسألوا عن (محمدعبدالله و دروجبا وحسين علي وهاني العجيزي وكل اللي سابهم جوزيه) عارفين ليه لأن حسين ياسر يمتاز بالتفليط وعدم التمرير وفقط المرواغة حتى تنقطع الكورة او يشوط على الجول حتى لو مزنوق وشعاره الشوط الأول ابداً لن امرر او ارفع الا لما اتزنق والشوط الثاني بيخلص بنزين واللي بيشيل بلاويه فقط عبدالشافي وانا من وجهة نظري افشل صفقة للزمالك لاعب حواري درجة اولى
علاء علي: محتاج تظبيط يجيد المرواغة والتسديد والعرضيات لكن لابد من اللعب بسرعة ومع زمايله وهيكون جناح ممتاز وافضل 100 الف مرة من حسين ياسر
رأس الحربة: عمرو زكي - جعفر - ميدو - ابوكونيه - عودية - حتى حسين حمدي بتاع المقصة:
كلهم copy and paste من بعض نسخة مكررة للاعب الفرود الهجام اللي بيهد في الدفاع وصحته حلوة ويجيد الالتحام ويحتاج بشدة لعرضيات وخروجه برة الصندوق يفقده خطورته لكن للآسف العرضيات بتروح لهم قليلة جداً لأن حسين ياسر مش فاضي بيرقص او عايز يشوط وشيكابالا بيلعب العرضيات لما يتنزنق ويحس ان الماتش هيضيع اخر 10 دقايق زي ماتش بتروجت لجعفر وماتش الجيش لابوكونية العرضية الوحيدة في الدقيقة 82 اللي جت على دماغه ناقصنا المهاجم الفنان اللي بيلعب بدماغه اللي يجيد كرأس حربة تاني وبيلعب على اخطاء المدافعين واخذ المساحات الفاضية من وراهم وافتكر انه مكمل للمهاجم القوي الهجام لكل الماهجمين الموجودين في الزمالك والوحيد اللي كدة اعاروه وهو عماد محمد حتى حسام لم يكن مقتنع به من اساسه يعني حاجة زي متعب وكمان يجيد اللعب مع الهجام زي زكي في المنتخب او فلافيو زمان
من الاخر حسام لا يعتني بالدفاع وبيلعب اللاعبين في مراكز غير مراكزهم فهو لا يعلم امكانيات لاعيبته زي محمد ابراهيم نفسي يلعب رأس حربة تاني او تحت رؤوس الحربة وشيكابالا يلعب جناح سواء يمين او شمال ومايلعبش ابداً رأس حربة تاني او تحت رؤوس الحربة ونفسي حسين ياسر يباصي او يلعب عرضية بسرعة ونفسي علاء علي يلعب مكانه وحسام يعدل لأنه بيلعب بأسم حسين ياسر فقط واتفرجوا عليه وتابعوه حتى وجيه عبدالعظيم اللي لعبه جناح ايسر لا يصلح لهذا المركز لأنه بيلعب تحت رؤوس الحربة ويجيد الوقوف على الكرة والتمرير البيني ولا يجيد الانطلاقات من الخلف او السرعة علشان يلعب جناح
الزمالك محتاج :
مدرب يعدل بين اللاعبين ويفهم امكانيات لاعبيته ناهيك عن امكانيات الخصم واتمنى يكون اجنبي
2 مساكين اقوياء سراع مش بيلعبوا على الكرة اكثر من اجسام اللاعبين الخصم.
لاعبين خط وسط مدافعين يجيدوا اقتناص الكرة والدفاع القوي في نص الملعب واللعب على الكرة بعدم اندفاع وبعقلانية وبناء الهجمات
لاعب رأس حربة عنده مخ مش عضلات زي عماد محمد
لاعب جناح ايسر مع علاء علي ويرموا حسين ياسر في اقرب حارة مع حازم امام
جوزيه مدرب يعدل بين اللاعبين يعرف ماهي امكانيات المركز واهم مايتميز به هو اللعب على الاطراف وبسرعة يعني مش بيعجبه لعب الحواري زي ماقولت وزي مادومنيك كان بيعمل وجدو وبيحاول يعلمهم كورة او يركنهم بصراحة سر تفوق الاهلي والكرة المصرية في الفترة الماضية حاجة واحدة هي جوزية واسألوا شحاته الفترة اللي فاتت دي ازاي معاه قاعدة عريضة من الدوري والمحترفين ومش عارف ينتقي لاعيبة جاهزة ويبني بيهم فرقة لان جوزية مكنش موجود وشكراً