اللى بيته من إزاز ميحدفش الناس بالطوب !!
كتير اوووووى بنسمع المثل ده
" اللى بيته من إزاز ميحدفش الناس بالطوب"
طب بنقوله امتى الكلام ده ؟؟
لما حد يقولنا ازاى يافلان تعمل كدة ومينفعش ويقعد ينصحنا
يروح المثل لا اراديا يطلع فى وش اللى بينصحنا
ونكلم ف نفسنا ونقول ازاى يقول كدة هو يعنى مبيغلطش ولا هو ملاك
يروح ينصح نفسه الأول
ده بيعمل بلاوى جاى عندى وهيعملى فيها شيخ !!
طب عاوزة اعرف ليه زعلت لما هو نصحك فى شئ غلط
انت نفسك عارف انه غلط؟
ليه اضايقت لما انتقد فيك تصرف غلط؟
مسمعتش مقولة لسيدنا عمر بن الخطاب رضى الله عنه بيقول
" طوبى لمن أهدى إلىّ عيوبى " !!
فى ناس بتكون مش واخدة بالها من شئ غلط بتعمله
او مش عارفين انه غلط الناس دى بتفرح لما حد يقولهم عيوبهم
بيبادروا انهم يتغيروا ويتوفقوا عن الشئ الغلط ده .. ليه انت بقى زعلان !!
ليه الكبر اللى بقى فينا ده وليه مستكبرين نسمع النصيحة ونتقبلها
وليه منشكرش اللى بينصحنا ونقوله شكرا نبهتنى انى اخد بالى من
العيب او الغلط ده؟
للأسف المثل اللى ابتديت بيه كلامى ده بقى معناه خطير جدااااا
عارفين معناه ايه؟!
ان مينفعش حد ينصح حد وهو بيغلط
عارفين معنى الكلام ده ايه؟!
ان طالما كلنا بنغلط يبقى المفروض محدش ينصح حد خالص
مدركين برضو نتايج الكلام ده !!
نتايجه مفيش حد هيتكلم فى الدين مثلا ويوعظ فينا
هيتكلم وينصح ليه وهو بشر وبيغلط برضو !!
مكوناش هنلاقى دعاة او شيوخ او قنوات وبرامج دينية
مكوناش هنلاقى الدعوة الى الله فى البيت والشارع
والنت وكل مكان
ده حتى سيدنا النبى عليه افضل الصلاة وأتم السلام بيقول :
" من رأى منكم منكراً فليغيره بيده فإن لم يستطع فبلسانه فإن لم يستطع فبقلبه وذلك أضعف الإيمان "
مقالش اللى بيعصى الله وبيغلط ميغيرش المنكر ده !
ليه دايما نستكبر نسمع النصيحة ونظن سوء فى اللى بينصحنا
حتى لو بيعمل نفس الغلط اللى بينصحك تسيبه
مش يمكن هو عاوز يشوفك هتوقف الغلط ده وساعتها تشجعه
انه هو كمان يبقى زيك وربنا يقدره ويعينه بسببك انه يسيب الغلط ده!!
مش هطول اكتر من كدة لأنى عارفة زهقتوا ومليتوا من طول الموضوع
لكن هنتناقش فى كام سؤال
هل قابلتوا حد نصحتوه وكان رده المثل ده؟؟
ولو حصل هل عندكم الجرأة بعد كدة تنصحوا حد تانى؟؟
هل الرد ده بيكون سببه اسلوب النصح نفسه وطريقة الناصح؟؟
هل لسه فى ناس بتفرح بالنصيحة وتشكر اللى بيقدملهم النصيحة؟؟
لو حد تعرفوه وجه قال نصيحة رغم انه ممكن يكون بيعمل بعكسها
هتتقبلوا الكلام ولا هتقولوا " اللى بيته من إزاز ميحدفش الناس بالطوب " ؟؟