نجوم مصرية
منتديات نجوم مصرية منتديات شباب وبنات بنات

تابع نجوم مصرية على أخبار جوجل

تابع نجوم مصرية على تطبيق نبض الإخباري



حلال المشاكل :هي بتحب تشتري الحاجات وهو ع القهوة عايز يبات

 

السلام عليكم

المراه والرجل :- خرج أحدهما من ضلع الآخر، فهم في الأصل شريكان في طريق مالهوش آخر، ولكنهما رغم كل ما سلف لا يكفان عن التناحر.. ناقر ونقير.. ثنائي بحق مفزع وخطير.
شعارهما دائما: "نعم للخناق ولا للاتفاق"!!

موضوع يطرح حلول لمشاكلهم المستعصية، حتى تصبح الحياة مية مية، كل يوم هنقدم مشكله مشكلة وحلها بكل وضوح، من غير ما "هي" كرامتها تتهان، ولا "هو" يحس إنه مجروح.


ومشكله النهرده طبعا مشكله كل بيت الاهتمامات المختلفه بين الراجل والست يعنى الراجل مش بيحب الشوبيج واسوأ يوم بيقضيه فى حياته فى اليوم دا والست بتكره الكوره والقهوه والاصحاب وبتعتبرهم
زوجه ثانيه للزوج

تعالوا نشوف المشاكل دى وحلها ايه

حياتي كلها عروض خاصة

هو: أنا بقى حكايتي حكاية.. البنت اللي ارتبط بيها كل الناس حسدوني عليها، وقلت هي دي اللي بادور عليها من زمان؛ بس طلع فيها عيب رهيب؛ إنها بتحب الشوبنج أكتر من باباها وماماتها؛ يعني يكون شعورك إيه وأنت خارج كل مرة رايح كارفور أو هايبر أو سبينيس أو أولاد رجب... يعني المتعة كلها في إنك تجر العربية بتاعت الشوبنج، وتبتسم ابتسامة خفيفة على الجنب وأنت داخل على الكاشير، المشكلة مش في الفلوس -ولو أنه هيبقى عبء برضه- لكن المهم دلوقتي هو موضوع المرض بالشوبنج ده، واللي أعراضه بتزيد يوم بعد يوم.. تفتكروا أن أنا ممكن أقدر بعد كده أقضي حياتي في المولات باتسوق وأعمل شوبنج!! نفسي أخرج معاها.. نفسي نتمشى حتى لو على الكورنيش، وناكل ذرة مشوي.

المشكلة الموضوع دا شكله قلب بمرض؛ يعني ننزل نعمل شوبنج وخلاص، ونجيب حاجات ممكن يكون عندنا منها نفس الشيء اتنين وتلاتة ولم نستخدمها؛ والحجة أنه في عروض خاصة وأسعار مميزة وممكن ما تحصلش تاني؛ ولازم نغتنم الفرصة قبل ما تضيع، والكلام يقلب على مندوبة مبيعات من بتوع التسوق التليفزيوني (فرصة لن تتكرر اغتنمها الآن مع العرض الجديد من الحبشتكانات وأسعار خاصة).. بجد الموضوع صعب جدا؛ ده أنا فكرت أفتح فرع من فروع الماركت عندنا في البيت بعد كده ونوفر المشوار والشوبنج، أو نسكن هناك جوه الموووووول.. جوه العربية ذات نفسها.

ههههههههههههههههههههههه الله يعينه فعلا مرض

والحل بيقول انك يا تتأقلم يا تتألم

التسوق والشوبنج أصبح شبحا يطاردنا جميعا؛ يعني تفتح التليفزيون تلاقي إعلانات كتيييير "تسوق عبر شاشات التليفزيووووووووون".. تنزل الشارع تلاقي الإعلانات في كل حتة.. تروح أي مكان أكيد مش هيكون خاليا من التسوق، فالمرة دي لازم تيجي على نفسك وتتأقلم مع الوضع يا كبييييير؛ يعني تحسس نفسك إنها فسحة أو خروجة وأي شيء وخدها من الجانب الكويس؛ يعني أماكن نظيفة فيها ناس محترمين، ووجوه جديدة هتشوفها لأول مرة، غير كده حاول تغير مرة كارفور المعادي ومرة هايبر أكتوبر ومرة سبينيس سيتي ستارز... كده يعني؛ بس لازم ترفع شعار "نعم للخروج والشوبنج.. لا للمصاريف والتكاليف" وأفهمني صح، يعني الموضوع مش بُخل خالص؛ الموضوع كله توفير واقتصاديات؛ إلا لو كنت اللهم لا حسد.. ساعتها مافيش أي مشكلات إن أنت "تقع" قصدي تجيب كل حاجة، بس الميزة في التوفير إنها ممكن تزهق من كثرة نزولها المولات أو أي شوبنج على الفاضي، ووقتها تقرر إنها تنسى الشوبنج شوية.

أما بالنسبة لها فيا ريت تحاول تغير حتى لو التغيير من باب التغيير، أكيد في أولويات أخرى مهمة زي موضوع الشوبنج ده بالظبط، وأكيد لو همّك أنه يكون سعيدا؛ نحاول نيجي على نفسنا شوية من أجل الطرف الآخر.


المشكله التانيه

حبيبي شيش بيش وقهوة على الريحة يعنى مدمن القعده على القهوه

هى : أنا بصراحة حبيبي حاجة تاني خالص.. حاجة كده تيجي على الجرح يطيب، بس أنا اكتشفت أن أنا ليّ "ضُرّة" في حبه!! أيوة والله "ضُرّة" واسمها القهوة، عيبه الوحيد أنه مُدمن قاعدة القهوة مع أصحابه، هو كويس وكل حاجة بس؛ لما بيقعد مع أصحابه على القهوة ويبدأوا يلعبوا الدومينو أو الطاولة أو الكوتشينة بينسى كل حاجة في الدنيا، بينسى يكلمني أو يطمني عليه أو حتى يرن، ويفضل سهران طول الليل مع أصحابه، ومش بعيد يطبق لحد ميعاد شغله، ده لو فيه حد عايز يقابله بيروح له على القهوة، وممكن يشتغل كمان من هناك، المشكلة أن أنا كنت متقبلة الموضوع ده في أول ارتباطنا؛ بس الموضوع زاد عن حده، طب هيعمل إيه بعد الجواز.. مش هيطلع البيت ولا هانزل أنا أقعد معاه على القهوة؟؟! بصراحة موضوع القهوة ده بقى حاجة صعبة جدا لكل الشباب؛ لدرجة أن أنا خايفة جدا من التأقلم على هذا الوضع في المستقبل.

الحل بيقول لو حبيبيك شيش بيش أعمليله دش ودبش وشاي بوسطه

الموضوع القهوة ده ساعات بيبقى شيء مهم وأساسي في حياة ناس كتير أتعودوا على كده، وبصراحة بيبقى صعب تغييره أو التقليل منه؛ خاصة لو صاحبنا ده من هواة الألعاب المسلية زي الشطرنج والطاولة والدومينو؛ لذا الحل سيحتاج لأكثر من طريقة حتى نكسب معركة القهوة، مثلا كده بما أنه بيحب قاعدة القهوة مافيش مانع إنك تقترحي عليه أنكم تذهبوا لأقرب كافية وتقضوا فيه وقت لطيف، وتحرصي أن الوقت ده يكون دمه خفيف ومليء بالبهجة؛ حتى يشعر بالفارق بينه وبين القهوة، وربما يطلب هو تكرار التجربة مرة أخرى، وفي الحالة دي يبقى إحنا وقفنا على أول سلمة في طريق الابتعاد عن القهوة، ومافيش مانع نكرر الموضوع ده مرتين تلاتة في الشهر، وفيه حل تاني كنت سمعته من عمنا أحمد فؤاد نجم -الشاعر الكبير- وكان بيحكي حكاية زي دي عن والده ووالدته، وكيف كان والده عاشقا لقاعدة القهوة ولعب الطاولة؛ وهو ما اضطر والدته لتتعلم كل الألعاب المسلية زي الطاولة والدمينو والشطرنج، ولم تكتفِ بذلك؛ بل احترفت الموضوع، وكان ذلك سببا رئيسيا في وجود الحاج فؤاد نجم في البيت، وفي بعض الأحيان كانت تحدد إقامته في البيت في حالة فوز الحاجة طبعا.

المشكله التالته بتقول
متجوزة شوبير ومدحت شلبي.. والحضري كمان

هى بتقول : -في موضوع تعبني جدا؛ وهو اهتمامات وهوايات حبيبي اللي ما بتخلصش بالكرة؛ يعني مثلا لو مع بعض في مكان رومانسي وفيه مباراة للأهلي أو المنتخب.. ألاقيه حرّك الكرسي في اتجاه شاشة العرض، وبقيت أنا في عالم النسيان؛ يعني الاهتمام كله ينصب في المشاهدة والتشجيع وتبادل الآراء مع الناس الغريبة أو اللي قاعدين حوالينا.

ويا سلام لو متفقين إننا نخرج أو نروح نزور حد معرفة، وعرف أن فيه مباراة مهمة أو حتى مش مهمة.. يطلب مني التأجيل والاعتذار للناس؛ وده بيخليني في "1/ 2 هدومي"، ومنظري سيء جدا؛ لأن أنا اللي بتصدر كل مرة.

الكرة عنده أبدى مني.. والاستاد أحسن من البيت.. والتليفزيون في أي مكان قاعدين فيه ما بيحولش غير بين الـجزيرة رياضة 1 أو 2 -ربنا يخلي قطر- أو مودرن، أو دريم، أو المحور، أو النيل للرياضة... تصدقوا ده يعرف معلومات عن اللعيبة أكتر من المعلومات اللي يعرفها عني، ولا مواعيد المبارايات.. حافظها صم، واتفرج بقى على ألبوم الصور.. تلاقيني في أول صورة معاه وفي وسطينا الكابتن وليد صلاح الدين في مباراة اعتزاله.. بعد كده تقلب تلاقي في أول الألبوم من اليمين للشمال حازم إمام، وخالد بيبو، ومحمد أبو تريكة، وفي وسط الألبوم هادي خشبة، ومحمد شوقي، وحسني عبد ربه، وفي آخر الألبوم تلاقي وائل جمعة، وشادي محمد، وفتح الله، وآخر صورة في الألبوم لـعصام الحضري؛ يعني من الآخر نجوم منتخب الألبوم.. ده حتى الغرف سماها بأسماء لاعبين؛ يعني تلاقي غرفة النوم اسمها "التتش"، والمطبخ اسمه "زامورا".

أنا خلاص حاسة إني بقيت شبه الكرة، أنا ماكنتش باكرهها أو في حاجة بيني وبينها؛ بس أنا دلوقتي مش طيقاها ولا عايزة أسمع سيرتها.. بصراحة أنا خايفة أصحى في يوم ألاقيه سابني وهرب على بره زي عصام الحضري.

الحل بيقول أبيض بخطين حُمر.. واللي يزيد عن حده يتقلب ضده

الموضوع ده مهم جدا؛ لأن الكرة حاليا أصبحت لغة الشعوب ومعشوقة الحماهير.. الساحرة المستديرة كانت ولا تزال وستزال أفيونة الجماهير؛ فحب الكرة أصبح من الأشياء البديهية؛ خاصة للشباب والرجال، لذلك لا بد أن يكون هناك حل وسط ويرضي الطرفين؛ فمثلا لو بدأت البنت بنفسها، وحاولت أن تغير من مسار اهتماماتها؛ بأن تضع الكرة وحب الكرة في أولوياتها -من أجل الحبيب- وبدأت بمتابعة المباريات، ولو هو بيشجع الأهلي ارتدي قميصا أبيض بخطين حمر.. وشجعي أنتِ الزمالك، بس أوعي يكون عصبي والموضوع يتفركش.. في الحالة دي مافيش مانع إنك تحولي للأحمر وتصبحين أحد أفراد الشياطين الحُمر، وفي هذه الحالة لن تندمي.

رساله للرجل فى الموضوع دا

مش كل وقت لازم البنت هي اللي تضحي؛ يعني (حط عقلك في رأسك تعرف خلاصك) لا بد أن يكون هناك هدنة أو استراحة بلغة كرة القدم، ويكون الحب والاهتمام مناصفة بين الحبيب والكرة؛ وزي ما في جدول للدوري اعمل أنت كمان جدول تقدر فيه أنك تسعدها وتحاول تلبي اهتماماتها، ولازم تتأكد أن "أي شيء بيزيد عن حده بيتقلب ضده"؛ يعني الحياة مش كلها برامج واستوديوهات تحليلية وتعليقات وقنوات رياضية... خلي فيها مكان لحبيبتك ولبيتك ولأهلك ولأصحابك.
(ههههههههههههه حلوه جدول الدورى دى )

خلاصة القول.. ومن الاخر "حبيبك يبلعلك الزلط"

من الآخر كده بعد ما استعرضنا الأمثلة السابقة لازم نشوف الموضوع من زاوية تانية غير الزاوية اللي كلنا بننظر منها، واللي بتدفعنا إننا ناخد قرارات جذرية في مواضيع ممكن تتحل بسهولة بدل ما تلاقي الواحد مننا سواء ولد أو بنت بيواجه حد يقوله:
"يا إما أنا يا إما الكورة اللي أكلت دماغك دي"، أو مثلا: "هي القهوة وأصحابك أبدى عندك مني"، وخد عندك مثلا: "باقولك إيه.. لو روحتي للكوافير ماتعرفنيش تاني"، أو "لو مابطلتيش موضوع الشوبنج ده أنا مش عارف رد فعلي هيكون إيه".. ألخ.. ألخ.. ألخ...

كالعادة كما نؤكد دائما أن كل حبيب لازم يقدم بعض التنازلات، لكن بشرط ألا تؤثر على الكرامة أو المبادئ والأخلاق أو تتعارض معها؛ بل بعض التنازلات بما يقرب المسافات بين الحبيبين، وعلى رأي المثل القائل: "حبيبك يبلعلك الزلط.. وعدوك يتمنى لك الغلط"، و"خد صاحبك على عيبه"، شوف لما يكون حبيبك -يعني لو بالبلدي كده مشينا على الأمثال دي- يبقى لازم نحاول نعدي بعض الأمور، ولا نتوقف عند كل غلطة أو تصرف؛ بل نحاول التقرب من هوايات واهتمامات الطرف الآخر؛ حتى تسير الأمور ونعالجها بحكمة ولا نضع أنفسنا في أي مقارنة مع هذه الأشياء البسيطة.

اتنظرونى بكره ان شاء الله مع حلقه جديده مشاكل جديده
وحلال المشاكل الزوجيه المستعصيه

سلالالالالالالالالالالالالام





تابع نجوم مصرية على أخبار جوجل

تابع نجوم مصرية على تطبيق نبض الإخباري




المقال "حلال المشاكل :هي بتحب تشتري الحاجات وهو ع القهوة عايز يبات" نشر بواسطة: بتاريخ:
قلب الملاك
حد متابع معانا ولا ايههههههههه
Mizoalex
مواضيع جامده جداااا

كل ما تكتب موضوع من دول ابعت لى اللينك

حكاية القهوة دى مشكلة كبيرة و كبيرة جداا

اللى انا اعرفه انى انت مثلا قبل الجواز بتكون حاجه و بتتغير بعد الجواز

بمعنى

انت قبل الجواز بتون لوحدك .. بمعنى انى ممكن اعمل اى حاجه فى اى وقت عشان انا لوحدى

انما بعد الجواز بيكون معاك حد مسئول منك .. يعنى انت قبل الجواز ممكن تسهر فى القهوة لحد الفجر

انما بعد الجواز ما ينفع نهائى ... انك تسهر كده و سايب مراتك فى البيت

انت كده تبقى انانى جداا و ما عملت حساب ليها

يعنى انت لازم توسط الامور و تعقلها ... ما ينفع اللى كنت بتعمله قبل الجواز يتعمل بعده

-------------
اما بالنسبة لموضوع الكورة ده بقا ... انا ليا تجربة شخصية معاه

البنت لازم تكون ذكية فى تعاملها مع حبيبها

هى مش هتقدم اى تنازلات او اى حاجه تقلل منها

هى بس هتتصرف بذكاء

انا مدمن كورة و عاشق للاهلى ... و الاهلى عندى اهم من نفسى

و لو الاهلى بيخسر بكون مضايق و زعلان زى ما بيكون واحد ميت عندى

حبيبتى الله يمسها بالخير كانت لاحظت كده انى مهتم بالكورة جدااا

هى اتصرفت بمنتهى الذكاء

انا السنة اللى فاتت دى كلها انا كنت فى الجيش

كنت ساعات مش بعرف اتفرج على الماتشات و كده .. هى بقا كانت بتعمل ايه

كانت بتتفرج على الماتشات و تبعت لى رسايل على الموبايل بالهجمات مثلا حد اتطرد حد جاب جون و كده

خلتنى اعرف اخبار الكورة من خلالها .. مع انها مش بتحب الكورة نهائى

بس اهتمت عشان انا بحب الكورة جدااا

و هى عارفه انى ممكن اضحى باى حاجه عشان الكورة

تخيل انى فى عيد ميلادى

جابت لى هدية ايه

تى شيرت الاهلى .. و مطبوع عليه رقم اللاعب اللى بحبه (( حسام عاشور 25 )) و مكتوب عليه اسمى (( Mizo ))

ذكاااااااااااء بجد

انا مثلا لما اروح الاستاد اكون لابس التى شيرت ده افتكرها وانا هناك مع انى المفروض اكون ناسى الدنيا و انا هناك

و هى قالت لى بالحرف انا مش مشكلة موافقة انى الاهلى ده يكون ضرتى

ما دام انت بتحب كده انا موافقة .. بس اوعى الاهلى يعطلك على صلاة او يبعدك عن ربنا

ياااااااااااااه و الله افتكرتها .. ربنا يسهل لها الحال و يديها الخير يا رب .. انا لسه بحبها بس خلاص الموضوع انتهى

قلبت على نفسى المواجع

قلب الملاك
ربنا يهديلك الحال
وكل كلمه قلتها صح
ومعاك حق فيها
اما بالنسبه لحببتك اهى سبتلك ذكريات حلوه وتجربه تفيدك
لبكره وبعده
وان شاء الله ربنا يعوضك بالحبك اللى اكبر من كدا بكتير وتقدر تنسيك بجد الدنيا

هى الزوجه الصالحه

شكرا قوى لمتابعتك



اسم العضو:
سؤال عشوائي يجب الاجابة عليه

الرسالة:


رابط دائم

مواضيع مشابهة:
الفوائد المزهلة لنبتة البقدونس لمن تبحث عن جمال بشرتها وفى نفس الوقت تبحث عن التخسيس هنا وبس 2×1
لو عايز تشترى كمبيوتر ومحتار
فنان يبدع لوحات رائعة باستخدام ملايين من حبات القهوة
للمصريين بالخارج لو عايز تشتري شقة على البحر
عايز تعرف فوائد القهوة ... اتفضل خش وشوف؟

Powered by vBulletin Version 3.8.8
Copyright ©2000 - 2022, Jelsoft Enterprises Ltd
جميع الحقوق محفوظة © fmisr.com منتديات نجوم مصرية