بسم الله الرحمن الرحيم
السلام عليكم ورحمه الله وبركاته
الى كل عضوات وزائرات المنتدى المخطوات واللى لسه ما تخطبوش ربنا برزقكم بأولاد الحلال وتعيشوا فى هنا وسهاده ويكرمكم بأجمل الاطفال
طبعا كل واحده مخطوبه وفرحها قرب بتبقى غرقانه لشوشتها فى تجهيز نفسها واحتياجاتها لبيتها الجديد مع شريك عمرها علشان كده هافتح معاكم الموضوع دى ونتكلم ونتبادل الاراء ايه هى الحاجات المهمه المطلوبه اللى العروسه تجيبها فى تجهيزاتها ويكون الموضوع دى مرجع لكل واحده بتجهز علشان ما تنساش حاجه
طبعا كل بلد ومنطقه ليهم عادات معينه وحاجات خاصه بتجيبها العروسه واحنا هنا هانتكلم فى الحاجات المشتركه فى معظم المناطق فى مصر
وهانبدأ النهارده بتجهيز النيش وفى الايام والردود اللى جايه هانتكلم فى الحاجات الباقيه ذى تجهيز المطبخ والسجاد والستائر والملابس الخاصه بكل عروسه يالا نبدأ على بركه الله
1-اول حاجه فى طقم النيش ومن الضروريات طقم الصينى وده بقى لازم تنقيه بعنايه فائقه قولو ليه لانه طقم العمر يعنى مابيطلعش الا للغالين
وغير كده لازم يكون فخم وشكله حلو وكل ماكان رسمته ارق كان اشيك وعلى فكره مش لازم يكون غالى يعنى فى انواع حلوه اوى ومش غاليه زى عندنا هنا فى مصر الصينى الاستثمارى الالمانى وفى من كذا سعر ويناسب كل الازواق واسعاره متدرجه بس الاهم ان خامته نظيفه بس بامانه الصينى البولندى يجنن بس ايه غالى اوى
2-طقم الاركوبال وده تانى حاجه فى الاهميه وانا هقول لكم احسن نوعين وهما اولا الفرنساوى وده انضف نوع لانه بيعيش بس مشكلته ان رسماته محدوده وراح عليه الزمن لكن التايلندى احلى فى الشكل وعدد قطعه اكتر كتير وتقدرى تستفيدى منها وتقرينا سعرهم فى السوق واحد بس انا انصحكم بالتايلندى
3-طقم الجاتوه وده اختيارى يعنى فى ناس بتجيبه وناس لا كل واحد ومقدرته وده عشان تحافظى على الصينى بتاعك وعلى سبيل التغير ومش كل ماهيجيلك ضيف تجرى على النيش وتجيبى طقم الجاتوه بتاع الصينى يعنى ممكن للنيش او للمطبخ حسب فخامته
4-طقم البيركس هو للمطبخ بس انا هقوله دلوقتى قبل مانسى واحسن نوع الفرنساوى الفميه منه شكله يجنن
5-الكاسات هاتى 5 للنيش وواحد شيك للمطبخ وتكون اسعارهم متهاوده بس احرصى ان يكون فيه واحد غالى وشيك اوى
6-قطقم العصير تجيبى 2عدد بشفشقهم واحد كبياته بكاسات وواحد كبياته طويله زى العصير وتجيبى واحد للمطبخ مش غالى وفى نوع جديد فى المطبخ زجاج سعودى ضد الكسر تحفه
7-كبيات عصير شكلها حلى اوى هاتى 3 كويس اوى ويكونوا اشكال مختلفه
8-طقم الخشاف فى نوع رخيص وحلو اوى وهو الايطالى شيك جدا وماركته كويسه وفى الانواع الصينى الجديده شكلها حلى بس الايطالى احسن ودى ازواق
9-طقم الجيلى واهم حاجه فى الجهاز طقم الجيلى وده كلام احمد حلمى مش كلامى نصيحه بقى هاتيه بقاعده من تحت عشان يمشى جيلى وايس كريم خليكوا ناصحين
10-بونبونبره شيك اوى
11-تحف صغيره كده بتعطى شكل جميل اوى وماتنسوش حاجه مهمه مفارش النيش فى ناس بتاخد الى مع مفرش السفره وانا راى اشتريهم لواحدهم هما مش غالين
12-بصوا ياجماعه فى فرق بين النيش والديفرسوار لو عندك لآ أن دى بنتختلف حطى فيه طقم صوانى تقديم استانلس شيك اوى وشنطة المعالق واطباق الصينى والاركوبال وخلى النيش للزجاج والتحف بس حسب حجمه يعنى تظبطى النيش
وبكده يبقى خلصنا اول حاجه واستنونى المره اللى جايه هانتكلم على حاجه جديده واللى شايفه انى كنت ناسيه حاجه فى ادوات النيش تكتبها ومتحرمونيش من ردودوكم وتفاعلكم مع الموضوع ويارب يعجبكم
اختكم داليا