بسم الله الرحمن الرحيم
السلام عليكم ورحمه الله وبركاته
الى كل اخواتى وحبايبى الحلوين اعضاء وزوار منتدى نجوم مصريه يعتبر الممبار من المحشيات اللذيذه والمفضله والمحبوبه لدى المستهلك وله قيمه غذائيه عاليه واليكم طريقه عمل الممبار بطريقه سهله وبسيطه جدا وغير مكلفه يارب تنال اعجابكم
المكونات :-
كيلو ممبار+ 1/2 كيلو بصل +3 كوب ارز + 2 حزمه شبت + 2 حزمه بقدونس+ حزمه كسبره +4 حبات طماطم كبيره معصوره فى الكبه +2 حبه طماطم مقطعه مكعبات+ صلصه طماطم +التوابل (فلفل اسود-شوية كمون - كسبره ناشفه - ملح - بهارات - نعناع مفروم)
طريقه غسل الممبار:-
( خل - ليمون - ملح - دقيق- كربوناتو)
طريقه التحضير : -
جيبى صينيه وحطى فيها شويه كربوناتو وميه وبعد ذلك جيبى الممبار واقلبيه على ظهره تحت الحنفيه هاينزل مننا بسهوله وبعدين اقلبى واحده واحده من الممبار ونحطها فى الميه اللى فيها الكربوناتو وبعد منخلصه كله نسيبه فى الميه دى شويه بتاع تلت ساعه وبعدين جيبى السكينه ونكحته هيطلع منه الوساخه بسهوله عشان كان منقوع فى الكربوناتو وبعد منكحته كويس من الجنبين نشطفه كويس
وبعدين نجيب صينيه فيها ميه وملح وخل وليمون وحطى فيه الممبار وسبيه نصف ساعه منقوع وبعد ذلك اغسليه كويس جدا وبعدين ننقعه فى الدقيق زى مابنغسل الفرخه ونسيبه فى الدقيق لحد ما تحضرى الخلطه
طريقه عمل الخلطه :-
جيبى الارز واغسليه وصفيه كويس وبعد ذلك حطيه فى الصينيه وبعدين نضرب البصل فى الكبه ونحطه على الرز واضربى الطماطم فى الكبه خدى بالك مش الخلاط عشان تكون تخينه شويه وبعدين نقطع الطماطم التانيه مكعبات وبعدين هانحط كام معلقه من صلصة الطماطم تديها لون وبعدين نقطع الخضره ونقلبهم مع بعض وبعدين نحط التوابل ونقلبهم كويس جدا وبعدين نغسل الممبار من الدقيق ونحطه فى المصفه ونحشيه بالخلطه وبعد كل واحده ننزل منه الهوا بعد الحشو يعنى نبططه بايدنا عشان ميفرقعش فى الحله وبعدين نكون محضرين حله على النار فيها ميه وملح ونعناع وبصله مقطعه ونحط فيه الممبار ونقلبه كل فتره عشان ميلزقش فى الحله وبعدين يطلع ويتصفى ويتحمر
ملحوظه : -
متمليش الممبار قوى خلطه عشان ميفرقعش وميطلعش الرز غير مستوى