السلام عليكم ورحمه الله وبركاته
الى كل اخواتى واعزائى اعضاء وزوار منتدى نجوم مصريه كل عام وانتم بخير
انهاردة حبيت اشاركم طريقة عمل المكرونة بالباشميل على طريقتى الخاصة ياريت تعجبكم
هنبتدى على طول
المقادير
مكرونة مسلوقة بشاميل
ولحمة عصاج
نفصص واحدة واحدة
المكرونة هنسلقها ونصفيها عادى زى ما بنعمل دايما مع الملح والزيت والتقليب المستمر
البشاميل
هنحتاج3 ملاعق دقيق
مع 3 ملاعق زبدة او سمنة
كوب لبن
كوب مرقة فراخ او لحمة
بنحط السمنه على النار وعليها الدقيق مع التقليب المستمر وبعدين نضيف اللبن واحدة واحدة مع التقليب السريع لحد ما يتظبط معانا نضيف الشوربة
ونسيبه لحد ما ياخد القوام المطلوب وانا بضيفله شوية جبنة وهو بيغلى مع الملح والفلفل والبصل البودر
وكدا البشاميل بتاعنا خلص
نيجى بقى لاخر حاجة
اللحمة العصاج
انا بجيب نصف كيلو لحمة مع بصله كبيرة وفلفلاية خضرة وفلفلية حمرة واحطهم فى الكبة الميكسر يعنى
وافرم كله مع بعضة واحطة فى الطاسة مع الملح والفلفل واسيبه يعيش حياتة لحد ما يستوى ومن حين لحين بضيفله شوية ماية صغننين
وبضيفله نصف معلقة بهار قرفة
ونصف معلقة بهار لحمة
كدا التلات حاجات بتوعنا جاهزين
الطريقة بقى
او حاجة نجيب البايركس بتاعنا ندهنه بماده دهنية واحط شوية بشاميل صغننين
والمكرونة بكون ملخبطاها فى نص البشاميل بتتاعى مع بيضه مخفوقة
فباخد نصفها واحطه
وبعدين اضيف طبقة لحمة
وبعدين بقية المكرونة وباقى البشاميل على الوش
ونرش الجبنة المبشورة على وش الصينية مع رشة بقسماط خفيفة وندخلها الفرن بتعد رع ساعة تاخد اللون المطلوب
وبالف هنا وشفا
يارب تعجبكم