الفكرة انتى تغيرى فيها وتبدعى يعنى ممكن من تورتة مدورة تبقى مربعة وممكن نعمل من نفس المقادير سويس رول ونزينه بالكريمة
المهم الاساس يكون صح والطريقة كمان
اما بعد
بعد ما الكيكه طلعت نسيبها تبرد خاااااااااالص
ونلفها في كيس بلاستيك كويس و تدخل الثلاجه لتاني يوم
ده بيخليها اسهل في التقطيع و تكون متماسكه
نبدأ تجهيز التزيين بعد ما نتاكد إن الكيكة طلعت حلوة
مش نجهز الكريمة و الشوكولاته و تطلع الكيكة من الفرن مبططه
نبدأ و نكمل تزيين الكيكه اللي عملناها..
انا جربت بودرة الكريم شانتيه و الكريمة اللباني
لقيت اللباني اسهل و لها طعم احلى كثيير
انا باستعمل اللي بتيجي في علب كرتون زي
مش نوع محدد ..اللي في دي نباتيه
لو هتعملي حشو ابيض نحط الكريمة في الفريزر يبرد كويس
علشان لما نخفقه بسرعه يتماسك ...
ونحط رشه فانيليا و ملعقه سكر بودرة
وأول ما تلاقيه تقيل توقفي الخفق لأنه هيتحول زبده
لو هنعمل حشو شوكولاته هنستعمل مقدار متساوي من الكريمة و من شوكولاته مبشورة
نحط الكريمة على النار مع التقليب المستمر و اول ما تغلي نطفي عليها و نحط الشوكولاته
ونقلبه لحد ما تذوب الشوكولاته ونغطيها بكيس فوق الخليط مباشرة علشان ما تعملش قشرة
ونسيبها تبرد في الثلاجه.....لو عايزة تغطي التورته من فوق بشوكولاته سائله
شيلي نص الخليط زي ما هو للتغطية من فوق
الباقي نضربه بالمضرب لحد ما يتماسك زي الكريم شانتيه وده اللي بنحشي بيه
ونغطي بيه الجوانب بيبقى طعمه حكايه لانه شوكولاته مش كاكاو
نبدأ الشغل المهم ....نفرش مفرش على الترابيزه لأننا مش متخصصين فبنبهدل الدنيا
وكل الغرفه تبقى كريمة و شوكولاته ....نحط اي حاجه مقلوبه علشان نسهل الشغل على نفسنا
نحط القاعده اللي هنخللي الكيكة عليها و ندهنها بشوية كريمة علشان الكيكة تلزق و ما تتحركش
وطبعاً وش الكيكة هو اللي بنخليه تحت و نخلي قاعده الكيكة فوق علشان بتكون متساوية
نستعمل سكينه مشرشرة علشان نقسم الكيكة طبقات مع عليها من فوق علشان تتمكني منها
بعد كده نعمل قطع طولي (( خط واحد )) بارتفاع الكيكة علشان اكيد مش هنظبط التقطيع
وبكده لما نرجع كل طبقة نرجعها زي ما كانت ....مفهومة النقطة دي؟؟؟
نسمي و نحط اول طبقه و نرشها بشوية سفن أب (( 7-up )) علشان تفضل هشه و طريه وقت طويل
خللي بالك ما نرشش كثير يعني يادوب شويه على الحروف الناشفه و نقط رايح جاي على الطبقه
يعني التورتايه دي كلها خدت كوب واحد سفن أب.... لو زودتي هتلاقيها عجينه و ما تنفعش
نحط بقى الحشو و نرش شوكولاته و لو بتحبي فاكهه ومكسرات زبيب ...اللي يعجبك
ونغطي بالقطعه التانية بعد ما ندهنا من تحت بطبقة كريمة خفيفه علشان تلزق بسهوله مع الحشو
و ما ننساش نحط القطع اللي عملناه بالسكين فوق بعض و نضغط على الطبقة التانية و نساويها كويس
ونكرر الخطوات دي لحد ما نخلص الطبقات كلها
دي صور للطبقات وانا باعملها
الكريمة طبعاً بنخليها في الثلاجه علشان ما تسيحش مننا
نطلعها و نغطي بيها الكيكة كلها و الجوانب طبقة خفيفه
مش ضروري تكون مظبوطه لأننا لسه هنحط عليها طبقة
تانيه تكون مظبوطه ومتساوية و نبدأ نزوق الجوانب أي حاجه
انا واخواتى وكل احباءى بيفضلوا الشوكولاته يعني ولا جوز هند و لا مكسرات ولك انتى التنويع
.قمت ببشر الشوكولاته الخام و أضفت لها الزينة الملونه
علشان المنظر بس...و استعملت كيس حلواني لعمل اللي فوق
وحطيت شوية الشوكولاته السائله اللي شلناها على جنب في الأول
و الزينه الخارجيه انتي و شطارتك المهم الخطوات تمشي عليها كويس
وبجد انا مش عاملاها مقتنه قوي و لا حاجه بس الطعم بيبقى حكاية
أحلى من الجاهزة مليون مرة....جربوها مش هتندموا
ويارب تعجبكم و تدعولي انا و زوجي وولادي بالعفو والعافيه
تمت بحمد الله ولا قصة من قصص الف ليلة وليلة
