اخطاء تربويه يجب تجنبها عند تعاملك مع الاطفال
اول حاجه حاول ماتوجهيش طفلك قدام الناس او اطفال زيه ده طبعا بيخليه يحس بنقص من جواه وممكن تخليه كمان يبقى عنيد فحاولي حتى لو عمل غلط تاخديه على جنب وتكونوا لوحدكم وتحاولي تعرفيه غلطه ايه.
وكمان تجنبي تقوليلوا ذاكر عشان ماما تحبك او خلص الطبق وهكذا لان ده بيوصل للطفل ان حبك ليه مشروط وطبعا هايخليه يحس بعدم الامان وهاتخليه يوصل بفكره انه لو ماعملش الحاجه اللي المطلوبة منه فانه هايفقد حب الاخرين ليه وده طبعا سلوك تربوتي غلط فياريت تتجنبيه وكمان بيوصله انه يبقى سلبي ومنطوي ومايعرفش يعبر عن رايه.
وكمان ماتقعديش تقوليله مواعظ ومحاضرات لانها مش هاتنفع معاه لحد مايكبر لكن حاولي تناقشيه انزلي لمستوى فكره خليه يعبر عن رايه ويقولك كل حاجه جواه لان كتر المواعظ والمحاضرات هاتخلق عندك طفل غير واثق في نفسه وغير معتمد على نفسه.
وكمان اياكي والتدليل الزائد لانه هايكبر وهايعتمد على انابوه وامه يعملوله كل حاجه وهايخلي طفلك شخص اناني وكمان هاتخليه ضعيف.
وماتقعديش كل مايعمل حاجه غلط تفكريه بالغلط اللي قبل كده وتأنبيه وتعاقبيه على الغلطين لان ده هايخلي طفلك مايعرفش يعني ايه تقدير ذاتي وطبعا هاتخليه لحد مايكبر يخاف يعمل حاجه غلط عشان ماحدش يأنبه وده طبعا اسلوب خطأ لان كل شخص لازم يغلط عشان يتعلم.
واخيرا احب اقول لكل اب وام راجع نفسك قبل ماتربي ابنك في كل سلوكياتك واعرف ان تربية والديك تختلف عن تربيتك لابناءك لان الزمن قد اختلف من ظهور كثير من الاشياء الحديثة فيه فتأني في تربيتك لابنائك.