كل ست بيت مصرية ليها اكلات بتتفنن فى طريقة عملها وبتبقى تحفة من ايديها يعنى فى ستات تقول عليها استاذه ملوخية او دكتورة فى المكرونات والارز وكده فى حاجات معينة بتتألق فيها الست وفى طريقة عملها لكن مهما كانت الاكلات دى جامدة من ايديكى بتلاقى اهل بيتك بيملوا منها وده طبيعى لان النفس بتحب التجديد وبتكره التكرار وعشان كده هتلاقيهم ساعات كتير بيبقى نفسهم ياكلوا بره حتى ولو كان اكلك احلى كنوع من التجديد وعشان الحاجة اللى بتتعمل بره البيت مش بتبقى مضمونة ومش بنعرف مصدرها يبقى ليه بقى لما ممكن نعملها فى البيت واحنا مطمنين ونوفر ونطمن على صحتنا وصحه كل البيت وكمان يبقى تجديد فى البيت وتتعلمى حاجة جديدة ومن الحاجات اللى بيحبها المصريين جدا هى ساندويتشات الشاورما اللى بتعتبر من اشهر الاكلات السريعة واللى ممكن تقديمها للاطفال اللى مش بياكلوا جبنالكم طريقة عملها فى البيت بكل سهولة .
المقادير :
3 صدور فراخ مخلية + 3 فصوص ثوم ناعم + علبة زبادى + عصير ليمونة + معلقة كبيرة خل + 1/2 معلقة بهارات + ملح وفلفل اسود + حبة طماطم متوسطة + بصلة وسط + 1/4 معلقة زنجبيل + فلفل الوان .
الطريقة :
1 - قطعى صدور الفراخ الى شرائح وحطيها فى اناء غويط .
2 - ضيفى على الفراخ كلا من الزبادى والخ والزنجبيل والبهارات و الملح والفلفل الاسود والخل والثوم وتترك لمدة ساعتين .
3 - قطعى البصل الى شرائح ويوضع فى مقلاة ساخنة مع قليل من الزيت ويقلب حتى يبدأ يحمر ثم تضاف اليه شرائح الفراخ بدون تصفية التتبيلة ويقلب جيدا حتى اقتراب النضوج .
4 - تقشر الطماطم وتقطع الى مكعبات ثم يقطع الفلفل الالوان الى شرائح ويضاف الى الدجاج ثم تضاف الطماطم وترفع الشاورما بعد النضج .
5 - تقدم الشاورما على هيئة ساندويتشات فى الخبز اللبنانى او الفينو .
