كوارع -عيش -رز -صلصة طماطم المعلبه-خل-توم
اولا بنغسل الكوارع كويس جدا بخل وملح وبعدين بنغلى ميه بنحطها فى الميه تغلى غلوتين بعدين بنشيلها وبنغير الميه احنا بنعمل كده علشان تتخلص من اى زفاره موجوده فيها وكمان عشان تخف الدسامه بتاعتها
بنملى الحله ميه بنضيف لهاحبهان وورق ﻻورى وفلفل اسود وكسبره ناشفه وبصله متقطعه وتوم ومعلقة سكر كبيره بسمع انها بتخلى الكوارع تستوى بسرعه بس اول الميه ما تغلى بنزل الكوارع ونسيبها لحد ما تستوى وبنملحها كده الكوارع جاهزه
نيجى بقى للرز نحمره عادى ونسقيه بشوربة الكوارع ونسيبه يستوى
العيش بنقطعه قطع صغيره ونحطه فى صنيه بالفرن يتحمص شويه بس حاسبى ليتحرق منك
وطريقة الصلصه
بتشوحى توم مفروم فى حبة سمن بلدى وبعدين تحطى عليه معلقتين خل كبار وتكونى جايبه صلصة الطماطم ومخففاها بمية وتزودى بيها التوم والخل وتملحيهم وتسبيهم يغلو كام غلوه مع بعض تخلى سمكها مش تقيل اوى وﻻ خفيف اوى
التقديم بقى
بتجيبى طاسه وتحطى فيها معلقتين سمن بلدى كبار تشوحى الكوارع بس تشويح بسيط وتشليها وتحطى مكان التشويح العيش المتحمص تقلبيه فى السمن وتسقيه بالشوربه بس متخليهوش يلين اوى منك
بتجيبى اى صينيه عندك تحطى العيش من تحت وفوقيه الرز وتساويهم كويس وتحطى كبشة شوربه وبعدين تقلبيهم فى طبق التقديم وترصى الكوارع فوقهم وتحطى صلصه كده عالوش وتقدمى جمبها طبق فى صلصة الخل والتوم
او ممكن التقديم بقى على طريقتك اللى تجبيها اكيد هتبقى احلى منى بكتير
ياارب اكون عرفت اوصل الطريقه بشكل صحيح ومفهوم معلش بقى معنديش خبره اوى فى كتابة وصفات اﻻكﻻت ويارب تكون عجبتكو وبالهنا والشفا
