طيب فى مشكلة أن فعلا فى بعض من الناس وزنها زايد وكل يوم تأجل خطوة الرجيم أو أنها توصل للوزن اللى هيوصلها لحالة أحسن ، وده أكيد لأنك محتاجه لصبر وإراده وكمان تنظيم لخطواتك وهنقولك طريقتها حالا :
أولا : الثقه :
لازم تبقا واثق أنك قدها وأنك قادر توصل للوزن اللى بتحلم بيه مهما كانت المغريات اللى بتقابلها وأنك هتقدر تحقق اللى أنت بتتمناه
ثانيا : تحديد الهدف :
شئ مستحيل لما يكون واحد مفروض أنه ينزل 70 كيلو ، ويقول أنا عايز أنزل كل دول كده أنا بعجز نفسى ومش هنزل بل بالعكس أنا ممكن أزيد عنهم
المفروض أنى أقسم ال 70 كيلو دول على مراحل فلنفترض أن فى الشهر محتاج أنزل 4 كيلو ، ده معناه أنى محتاج أنزل فى الأسبوع 1 كيلو
أيه ده بس كيلو فى الأسبوع ، ده بسيط خالص فبالتالى هتقدر أنك تحقق الكيلو ويمكن كمان أكتر خلال الفترة المحدده
ثالثا: المتابعه :
زى ما قلنا أننا حددنا فى الأسبوع كيلو اتابع بقا أنا خسيتهم فعلا ولا لآ وأكون حريص أن أنا أحقق التارجت اللى حطيته لنفسى وأوزن نفسى للتأكد من أنى فعلا وصلت للى محتاجه خلال الأسبوع
رابعا : المكافأة :
لازم يكون فى تحفيز علشان أقدر أكمل ، بمعنى أنى لو قدرت خلال الشهر ده أنى أنزل عدد الكيلو جرامات المتفق عليها هيبقى لى هديه أو جايزة نظير تحقيقى لهدفى (اليوم الفرى أو الأجازة) كما يعرف
خامسا : ما تمنعش نفسك من كل حاجه :
مش معنى أنك عامل رجيم أنك متاكلش خالص دى من ضمن الأخطاء الكبيرة اللى بيوقع فيها ناس كتير واللى ممكن تضر بصحتهم وتصيبهم بالأنميا ومش ممكن يخسوا بالشكل ده خاصة السيدات
سادسا : السعاده :
لازم تحس أنك سعيد ومبسوط باللى أنت بتعمله وأنك مش مجبر عليه بالعكس أنت شئ مستمتع بيه علشان هيحقق لك اللى أنت بتحلم بيه وهو الوزن المثالى
تمت،،
ناديه نبوى