طيب مفيش حد فيكم فكر مرة هو انتوا بتعملوا أيه جوه البيت ؟ وهل الستات مش من حقها تعترض على مظهرك معاها زى ما أنت طول الوقت فى حزب المعارضه شعرك ، ريحتك ، لبسك ، أكلك ،........
كل ده بيأثر فى العلاقه بينكم
المظهر : يعنى مثلا لازم تهتم بلبسك جوه البيت زى ما بتهتم بيه بره البيت وما يبقاش لبسك فى البيت طول النهار يوم الأجازة بالفنلة الحمالات وكرشك مدلدل قدامك مترين وأول ما اصحابك يتصلوا بيك تجرى تلبس أحلى لبس وتنزل وتسيبها ، فى لبس تانى ممكن تلبسه بيجامة حلوة ، تيشرت وبنطلون وحاجات كتير أكيد مراتك هتحب تشوفك كده
النضافه : فى بعض من الرجال مش بيهتم قوى بحتة الاستحمام وبيبقا جاى من بره فى الحر زى كل الناس يعنى ريحته مش قد كده
بس مش معنى أنها ما اتكلمتش تبقا أنها مبسوطه بيك ، لا خالص على فكرة بس هى مش راضيه تحرجك
فحاول أنك اهتم بالجزء ده وحط برفان فى البيت وعلى فكرة البرفان اتعمل علشان يتحط جوه البيت أهم من بره البيت لأن مراتك هى الأهم والأولى أنها تشم ريحتك
المسئوليه: الستات مهما كان بعض منهن شخصيتها بتبقى قويه وبتتحمل المسئوليه فهى برده أحيان كتير بتشعر بالضعف وبتبقا محتاجة أنك تساعدها فى كل حاجة فى حياتها وأهمها سؤالك عنها ومذاكرتك لأولادك ويا سلام بقا لو كانت تعبانه تقوم تاخد الغسيل فومين
أهلها : البنت بطبيعتها طول عمرها بتبقا مرتبطه بأهلها أكتر شويه من الراجل وحتى بعد الزواج بتفضل علاقتها كبيره جدا بيهم ومش بتبقا قادرة تستقل فى كل حاجه فى حياتها فمفيش مانع يعنى لو أنت حددت يوم فى الاسبوع أو الشهر لزيارة أهلها وأنك تودهم وعلى فكرة هتاخد فيها ثواب وكمان هترتاح منها شويه
اغسل أسنانك : شئ مهم جدا أنك تهتم بمظهر أسنانك لأنها بتساعدك تكون بشكل أفضل وكمان علشان رائحة الفم
ولازم تعرف وتفكر فى الشئ اللى بيضايقك وأنت نفسك ممكن تكون بتعمله وأنت مش واخد بالك علشان تعيشوا فى حياة سعيده دايما.