الحلقة الاولي
سارة
فى طريق العوده للقاهره و من ساعة ركوب الطائره و انا لا ارى امامى الا يحيى , حتى انى كنت اغمض عينى حتى اراه اوضح , كأن الله قد مد لى حبال الصبر فقط لكى اؤدى مناسكه طالما كنت فى رحاب بيته المحرم , لكن بمجرد مغادرتى عدت مره اخرى الام الملهوفه التى لا تقوى على فراق ولدها , و بالرغم من انى كنت اكلمه يوميا , لكن حضنه و رائحته الطفوليه و كل تفاصيله التى اصبحت جزء منى لا تفارقنى منذ ركوبى الطائره, ايضا احس ان عمر عاد لى , عاد باكمله , منذ شهور كنت فقدت هذا الاحساس و الان و بفضل الله وحده عاد لى حبيبى و زوجى , لم اعده بذكائى لكن الله اعاده و قربت بيننا الرحله النورانيه اكثر و اكثر
يا ريت نقدر نكررها ..... لكن المره الجايه حاجيب يحي اه ما الحرم كان مليان عيال يعنى اشمعنى ابنى انا
عمر
يا ترى سامحتينى يا ساره ؟ و يا ترى سامحتنى يا رب على خطأى , يا عمر ده كان مجرد تفكير
لا لا لا, لا صغيرة مع استكبار و لا كبيرة مع استغفار ............ استغفرك ربى و اتوب اليك
لكنى لا عذر لى الا انى انسان و كان الانسان ظلوما جهولا اللهم باعد بيننا و بين خطايانا كما باعدت بين المشرق و المغرب , و لقد عاهدتك يا رب امام بيتك المحرم ان اعطى كل دقيقه من اهتمامى خارج عملى لساره و يحيى و ان اجعل منهما درعا يقينى الخطأ
سارة
ايه كل الاجراءات دى ساعه عشان نطلع من المطار يعنى يا ربى نيجى من السعوديه فى ساعه و نطلع من المطار فى ساعه و نصف لكن والله عندهم حق فى الاجراءات دى كلها . ده احنا الوحيدين تقريبا اللى مش معانا مروحه و بطانيه , ده انا خفت يشكو فينا عشان الموضوع ده , مشكلة الشعب الطيب ده انه بيحول كل سفريه حتى العمره الى مهرجان للسياحه و التسوق
يقولو علينا ايه فى السعوديه ما عندناش بطاطين فى مصر ؟ و بعدين و الله سألت نفسى كتير . ليه السعوديه بتستورد بطاطين اساسا ده هناك ما فيش شتا و الجو حر نار . وكمان ما تنفعش فيه مراوح خالص , حتحس انك قاعد قدام السيشوار , لكن الرفاق المصريين فى المطار عرفونى السعوديه بتجيب بطاطين و مراوح ليه و الله تلاقيها مستورده من مصر , الحمد لله يا عمر ان ماما فكرتنا بموضوع الهدايا ده و الا كان حايبقى شكلنا عره اوى
عمر
و الله يا ساره انا مش فاهم ليه كل واحد يباركلى ع العمره لازم اديله طاقيه او سبحه انما اغلى حاجه جبناها من هناك هى مية زمزم و اوعى تنسى تشربى يحيى منها
سارة
بس انا مش عارفه الناس دى لقت وقت ازاى تعمل شوبنج كده ده احنا طول النهار كنا فى الحرم و حتى لما خلصنا العمره بتاعتنا عملنا عمره تانيه انت لوالدك و انا لجدتى الله يرحمهم جميعا هوه ده الهدف الحقيقى
عمر
معلش يا ساره تفكيرك مش زى غيرك ربنا يتقبل منا و منهم هو اعلم بالنوايا
سارة
مهما حكيت مش حاقدر اوصف لحظة لقائى انا و يحيى , زى ما يكون غايبه عنى بقالى سنين , نسيت اسلم على ماما و بابا واحمد اخى ما شفتش فى الدنيا لحظتها غيره و نزلت دموعى غصب عنى و ده طبيعى
لكن هوه تنزل الدموع من عينيه بالشكل ده و هوه ما بيقولشى غير ماما ماما و باحس انه بيعاتبنى اكتر منه بينادينى بيقولى كنتى فين يا ماما كل ده انا حاسه دموعه بتقول كده يا حبيبى يا بنى ربنا ما يحرمنى من حضنك يا رب , بس مش كده يا يحيى عايزه اسلم على الخلق شكلنا بقه وحش فى المطار
عمر
يا عينى عليك يا عمر انت باين عليك ما لكش حد فى الدنيا حتى ابنك مش راضى يسلم عليك و حماتك ما سلمتش الا عشان ساره ايدها ما كانتش فاضيه , انما ايه اللى بين ساره و يحي ده ؟ اشمعنى انا
انا عايزه يحضنى ويمسك وشى و يبص لى زى ما بيبصلها كده و ايه كم البوس ده سبحانك يارب .........
.لكن حماتى ما نسيتش برضه تديله كلمتين هوه و اللى خلفه , هوه من لقى احبابه نسى اصحابه كده يقولو كنا بنعذبك يا سى يحيى هى كل الرجاله كده و اللا ايييييه , انما الشهاده لله الست و الله عملت الواجب و زياده روحنا البيت لقيناه زى الفل و بط و حمام احمدك يا رب ده انا بطنى نشفت من الفراخ المشويه
سارة
يا حبيبتى يا امى , ربنا يبارك فى عمرك و يخليكى يا رب , البيت زى الفل و الاكل محطوط ع الترابيزه و لا العروسه فى يوم دخلتها , دى كمان حاولت تاخد يحيى عشان ارتاح لكن بصراحه لا يحيى وافق و لا انا كمان وبعدين انا حاسه دلوقت ان عيلتى ما تكملش من غير يحي يعنى بقينا تلاته فى واحد ....
عمر
اناحادخل اشوف الرسايل على الميل بتاعى يا ساره لحد ما تفضى الشنط
سارة
تمتمت فى سرى (اه ربنا يستر من ايملات الشركه و زمايلنا اللى فى الشركه)
خرج عمر بعد دقيقتين ووجهه متغير جدا
فيه خبر مش كويس خالص يا ساره
