دعت صفحة ثورة الغضب الثانية علي موقع التواصل الاجتماعي الفيس بوك للتظاهر يوم الجمعة 7 أكتوبر في ميدان التحرير لإستكمال واسترداد الثورة كما دعت صفحة الاستاذ حازم صلاح ابو اسماعيل المرشح المحتمل للرئاسة "’معاً لترشيح الأستاذ حازم صلاح أبو إسماعيل للرئاسة’’ للتظاهر يوم الجمعة 7 أكتوبر للمطالبة بإنهاء حالة الطوارئ المعلنة حالياً إعتباراً من 30 سبتمبر 2011 وذلك عملاً بنص المادة 59 من الإعلان الدستورى على أن يكون أى قرار أو حكم قضائى مستنداً إلى قانون الطوارئ يصدر بعد هذا التاريخ فاقداً لشرعيتة الدستورية أو القانونية

والله العظيم حرام عليهم هى كل جمعة بمظاهرة مش المجلس العسكرى قرر يعدل الماده ال 5 بتاعت الانتخابات اللى نزلوا مخصوص عشانها الجمعة اللى فاتت يبقى ينزلوا الجمعة الجايه عشان الطوارىء الهباب اللى ماسكينها

تعرف يا باراديس انا لسه متفرجه ع حلقه النهارده من برنامج " مصر اليوم " بتاعت توفيق عكاشة ع قناة الفراعين

مش عارفه ليه فيه هجوم عنيف عليه يمكن عشان لغته الفلاحه بس ده مش عيب فيه مش عارفه ليه الهجوم

الصعب انه قال امور فى حلقه النهاردة رهيبه لو تعرف تنزل الحلقه تكون مشكور زى الدولارات المزيفة اللى هتدخل مصر من اسرائيل وطلب من الجميع توخى الحذر والبعد عن التغيير للدولارات الايام دى ولمده 6 شهور قال نستعمل الين اليابانى او اليورو بس نبعد عن الدولارات

ده غير الناس اللى كانوا فى مداخلات تليفونية كان فيه لواء سابق فى الجيش بكى وكان حزين عشان مصر اللى بتضيع خايف عليها بيقول كنت فى الثلاث حروب 67 والاستنزاف و73 بيقول محدش شاف اللى شفناه ولا العذاب اللى مر علينا عشان نرجع بلدنا

وكمان عكاشه اتكلم عن الدخول فى حرب مع اسرائيل بيقول الجيش المصرى مش متسلح غير باسلحه متخلفه وطبعا كل ده مستوردينه من امريكا بيقول هما طبعا بيعطونا السلاح الهابط اللى لو قامت حرب منعرفش نغلبهم بيه ده غير ان اسرائيل متقدمة عنا فى مجال السلاح ب 10 نقط وطبعا بمساعده امريكا

كانت حلقه بجد مش عارفه اوصفها والله الجنان اللى بيحصل ده كلنا هندفع ثمنه الجيش عليه ضغط ومسئوليات فظيعه وبيحاول ع قد ما يقدر يلبى طلبات الثوار بس احنا مخنا جزمة وانانيين واللى عايزينه لازم يتم محدش بيفكر فى مصر والاقتصاد والبورصة لا ده غير الاعتصامات الفئوية قال عايزين الدخل يزيد طيب نشتغل عشان يزيد ولا هنبيض ملايين عشان نكفى الكل

والله مهزلة اللى بيحصل ده خد بالك خلاص قانون الانتخابات اتعدل يبقى لازم ندور ع سبب عشان ننزل بردو نستغل الطوارىء ولو اتلغى نستغل محاكمة المدنيين وهكذا

بدل ما نفكر ازاى نعمر مصر وازاى نقدمها بنفكر ازاى نخرب مصر بانانيتنا حسبى الله ونعم الوكيل

ولو هما عايزين طلبات فدى مش طلبات اغلبيه المواطنين بيتكلموا بلسانهم ليه وكفاية اسلوبهم الساخر الغير محترم مع المجلس العسكرى اللى وقف جنبهم وحماهم ايام الثورة

ربنا يعديها ع خير انا تعبت وزهقت ومش بقول غير يارب رد كيد الاعداء واحمى مصر يارب

شكرا باراديس ع الموضوع

اسفه ع التطويل اكيد صدعتك بس مخنوقة وحبيت افضفض

تسلم ايدك ع الموضوع

ربنا يخليكي يارب انتي اكتر واحدة رايك يهمني لاني بجد حاسس في كلامك علي مدي حبك وخوفك علي مصر

شكرا ليك يا باراديس ع ردك الذوق مشكور ع مواضيعك الشيقه

اللي عايز يفهم الناس ينزل الشارع ومايسلمش دماغه للإعلام.. إنزلوا الشارع يامحترمين