السلام عليكم
المراه والرجل :- خرج أحدهما من ضلع الآخر، فهم في الأصل شريكان في طريق مالهوش آخر، ولكنهما رغم كل ما سلف لا يكفان عن التناحر.. ناقر ونقير.. ثنائي بحق مفزع وخطير.
شعارهما دائما: "نعم للخناق ولا للاتفاق"!!
موضوع يطرح حلول لمشاكلهم المستعصية، حتى تصبح الحياة مية مية، كل يوم هنقدم مشكله مشكلة وحلها بكل وضوح، من غير ما "هي" كرامتها تتهان، ولا "هو" يحس إنه مجروح.
للاطلاع على الموضوع السابق
حلال المشاكل 3 : امتى تقول للحب Stop
هنتكلم النهارده عن التنازلات اللي ممكن كل واحد فينا يقدر يقدمها للطرف الثاني من أجل استكمال المسيرة والوصول لبر الأمان.. بس التنازلات محتاجة لتوضيح والتوضيح محتاج لشرح والشرح محتاج لأمثلة، وده كله لأن المفاهيم عندنا اتغيرت واتلخبطت.. طب تعالوا نبتدي القصة من الأول..
يجب على "عبود " ألا يتعدى الحدود ممنوع اللمس ممنوع الهمس
في ساعة متأخرة من الليل..
هاتف منى المحمول اهتزّ ولم يُصدر صوتا؛ لأن منى محددة الوضع "فايبريشين" علشان عندهم في البيت نايمين..
وبصوت منخفض ردت منى: آلو يا أحمد.
أحمد: أزيك يا "موني" وحشتيني وقلت أطمن عليكي قبل ما أنام.
منى: ميرسي ليك يا "حمادة" وأنتَ كمان ليك وحشة كبيرة ومستنية النهار يطلع علشان أشوفك.. ويلا روح نام علشان تعرف تصحى بدري ومش تروح عليك نومة.
أحمد: "مونو" أنت مستعجلة ليه أنا كنت عايز أطلب منك طلب.
منى: أؤمر يا "حمو" محتاج فلوس؟ تعبان محتاج دكتور؟ جعان ابعت لك أكل؟ أنت ساكت ليه؟ محتاج أي حاجة مش عندك؟ ما ترد!!
أحمد بشيء من النرفزة: أهدي شوية أنت مدياني فرصة حتى آخد نَفَسي.. (يا ساتر).. كل اللي أنا محتاجه إني محتاجك جنبي.
منى بدهشة: طب ما إحنا على طول مع بعض.
أحمد بصوت منخفض أوووووي: أنا قصدي نفسي يعني.. يعني نفسي.. باقول لو ينفع يعني......
تقاطعه منى: ما تتكلم يا أحمد.
أحمد: بصراحة كده نفسي أمسك إيدك.
منى بانفعال: أنت فعلا محتاج حد.. بس حد يفوّقك.. تااااااااخ (ده صوت السماعة اللي اتقفلت في وشه).
ده مثال بسيط لحوار ممكن يحصل بين أي اتنين.. وهو فعلا حوار بسيط بس مش طبيعي وماينفعش يبقى طبيعي؛ لأن الموضوع لو بدأ بمسك الأيد، الله أعلم هينتهي على إيه، علشان كده كان أول حاجة نبدأ بيها هي المبادئ اللي نشأنا عليها واللي عرفناها في بيوتنا ومع أهلنا وحتى أصحابنا وكل واحد فينا اتربى عليها.. وبما أن كل واحد في الدنيا صاحب مبدأ، والمقصود بالمبادئ هي المبادئ الأخلاقية والدينية واللي مستحيل تتغير أو نحاول نغيرها.. علشان كده دي الحاجة الوحيدة اللي مش هيكون فيها تنازلات خالص.. بمعنى أدق لازم في علاقتنا نحافظ على الحدود اللي بينا.. ولازم علشان الطرفين يحافظوا على بعض يبقى لازم كل طرف يخاف على الطرف التاني حتى من نفسه، وده شرط أساسي في العلاقة يعني عند المبادئ ولازم ننسى كلمة التنازلات دي خالص، لأ ونرفع كمان شعار "ممنوع اللمس ممنوع الهمس" حتى لو الموضوع دخل في الجد وأصبح فيه خطوبة ودبل وارتباط رسمي .. برضه لازم نفضل على مبدأنا لحد ما كل واحد فينا يبقى في بيت التاني.
احنا بنحب ومرتبطين وفي الجد مستعدين
أحمد: منى أنت الهوا اللي أنا بتنفسه ونفسي أجيب لك حتة من السما وإن شاء الله ربنا يقدرني وأقدر أسعدك، وأوعدك إني هاواصل الليل بالنهار علشان ربنا يوفقني وأعملك حاجة تشرفك وتكوني مبسوطة بيها، ومش لازم أي حاجة تنكد علينا فرحتنا، ونكبر دماغنا في الحاجات اللي ما تستاهلش.
منى: أحمد أنت عارف إنك كل حاجة في حياتي وأن أنا ماقدرش أعيش من غيرك علشان كده أنا مستعدة أعمل أي حاجة علشان نفضل مع بعض؛ لأني مش متخيلة أني ممكن أبعد عنك أو يعدي يوم من غير ما أشوفك.. وماتقلقش أنا هاقف جانبك وهاساعدك لحد ما تقف على رجلك وتبقى حاجة كبيرة إن شاء الله..
ده الحوار اللي غالبا بيكون بين أي اتنين مرتبطين واللي بيدل على الحب الجاد يعني نرفع شعار (كلنا بنحب ومرتبطين وفي الجد مستعدين) كل واحد فينا بيعيش × قصة حب (على رأي أحمد حلمي) أو مرتبط يعني الموضوع داخل في الجد.. كلام جميل بس أنتم عارفين أن فيه حاجات بسيطة ممكن تفرق في العلاقة من أولها لآخرها أو بتكون الحاجات الصغيرة دي كفيلة تحول العلاقة لجحيم، علشان كده كان لازم نتكلم عن التنازلات اللي ممكن يقدمها أي طرف من أجل الطرف الآخر علشان المركب تمشي؛ بس مش في كل الأحوال ينفع نقدم تنازلات يعني ساعات آه وساعات لأ، وده هيكون من حقكم خاصة لو أنتم شايفين أن ده صح.. بس لازم الأول نفرق بين الصح والغلط.
من الآخر كده البنت لازم تحافظ على الحدود اللي بينهم وكمان تكون يقظة جدا في الموضوع ده؛ لأنه لا يقبل القسمة على اتنين.. وده مش تشدد ولا تزمت ولأي من المسميات دي خالص، وكمان مش عدم رومانسية ولا الكلام الكتير اللي ممكن يتقال في الحالات دي؛ لأن اللي بيطلب الطلبات دي هو نفسه اللي ممكن يفركش الموضوع كله بسبب إنك وافقتي عليها.. في حين أن البنت بتقدم الكلام ده من أجل الحبيب وتحت مسمى الحب؛ وهذا الأمر مرفوض شكلا وموضوعا.
أما بالنسبة لـ"روميو" سواء كان أحمد ولا "حمادة" ولا "تامر" ولا "عبود" حتى يجب ألا يتعدى حدوده ويعرف أن الأمر مش مقبول زيه زي البنت، ولا يحاول أن يستدرج البنت لأي من هذه الأمور.. لأن (اللي بيحب بجد بيخاف على حبيبه).. فيا "عبود" حافظ على الحدود!
وطبعا وبعيدا عن اى شىء المفروض البنت والولد مايكنش بينهم علاقه من الاساس الا خطوبه
بس انا قدمتلكم الموضوع دا لانو بيحصل وبيحصل كتييييييييييييييييير قوى
ان البنت والولد بيحبوا بعض من غير خطوبه وبغرض انهم هيتخطبوا ان شاء الله
يبقى ايه المانع اننا نعرف بعض كلنا عارفين الكلام دا
يالله ما علينا
اشوفكم فى الموضوع الجاى سلالام