الشعر الزائد حاجه بتزعج كل فتاه وكتير من الفتيات بتزيل الشعر الزائد ده بطريقه غلط هاقولك على شويه نصايح الاول وبعد كده هاقولك على طرق عشان تخففي الالم وانتي بتزيلي الشعر الزائد
النصايح هي:
لابد ان ترطبي جلدك قبل ازالة الشعر الزائد وطبعا باستخدام كريم مرطب يناسب جلدك ولازم تعرفي ان ازالة الشعر ده عمليه تقشير طبيعي للجلد واذا تم ازالة الشعر وجلدك جاف هاتكون العمليه اكيد صعبه ومجهده بالنسبالك وماتستعمليش الكريمات الغير معروفه لازالة الشعر لانها بكده ممكن تسببلك التهابات وحساسيه لجلدك ويستحسن برده انك تستخدمي مقشر للجلد قبل ازالة الشعر وحاولي قد ماتقدري بعد ازالة الجلد انك تستخدمي كريم مرطب لجلدك عشان الغدد هاتكون ضعيفه وده طبعا هايؤدي الى جفاف جلدك.
هاقولك على عدة طرق لتخفيف الم نزع الشعر الزائد؟
معظم البنات بتلجأ للكريمات لان الحلاوة طبعا بتسبب الم, لكن هاقولك على طرق زي البنج تستعمليها:
اول حاجه هاتخلطي ملعقة خميره بيره مع ملعقتين عسل ابيض وملعقه عصير ليمون وملعقه ماء ورد هاتخلطيهم مع بعض وتدهني المنطقه اللي عايزه تزيلي منها الشعر وتسيبيها لحد ماتنشف وبعد تبداي في ازاله الشعر.
وكمان ممكن تدهني معجون اسنان على المنطقه اللي عايزه تزيلي منها الشعر وتسيبيه لمده 5 دقايق والطريقه ده مفعولها سحر زي البنج مش هاتحسي باي حاجه خالص.
وزيت القرنفل برده ممكن تدهنيه مفعوله حلو وامن.
واخر طريقه دي هي هاتجيبي 3 ملاعق سكر وتحطيهم في نص كوبايه ميه وتحطي عليهم ملعقة خميره بيره وتخلطيهم مع بعض وتدهنيها لحد ماتنشف وتبداي في ازاله الشعر.