طبعا كلنا بنحب الكشرى بس عشان شويه بيعك فى البيت فعشان كده الناس بتحب تشتريه جاهز بس لا مافيش احلى من حاجه البيت صحيه ونظيفه فالنهارده جيبالكم طريقه سهله جدا وغير مكلفه ومش هاتحتاجى مواعين كتير يعنى المطبخ مش هايكركب ولاغسل مواعين واليكم اجمل واطعم واسهل طريقه لعمل الكشرى المصرى من مطبخى بالصور والخطوات يارب ينال اعجابكم
المكونات والطريقه
*الأول هننقع العدس قبليها بيوم بعد ما ننضفه كويس
* وننقع الرز قبل ما نبتدى الطبخ على طول
* هنحمر البصل عادى فى حله وننشله على ورق مطبخ
* فى نفس الحله هنحمر المكرونه فى الزيت المتبقى لحد ما يبقى لنها دهبى
وبعدين نضيف الشعريه وننقلب لحد ما تحمر
* بعد كده هنضيف العدس والرز بعد ما نصفيهم ونقلب لحد المكونات ما تفلفل
* هنسقى الرز والمكرونه بمرق لحم أو دجاج ونسيبهم لحد ما يغلوا
وبعدين نهدى النار ونغطى الحله لحد الكشرى ما يستوى
ودى النتيجه
* صلصة الطماطم
باحط معلقه من الزيت اللى حمرت فيه البصل فى كسروله وبعد ماتسخن
اضيف عصير الطماطم ولما تغلى أحط ملح وفلفل اسود واسيبها تتسبك
* الدقه
فى كسروله صغيره أحط كام فص توم مفروم
ومعلقتين خل ومعلقتين من الصلصه اللى عملناها وكوباية ميه وملح وكمون وشطه
واسيبهم يغلوا غلوتين وبعدين أطفى ولما تبرد شويه أعصر عليها نص ليمونه
وبس خلاص
