بلاتوه : ( موبايل ) ( المكالمة التالتة من بداية التعارف واليوم الثانى )
هو : ياااه وحشتينى جدا انهاردة يا حبيبتى طول اليوم بفكر فيكى مش عارف انتى عملتى فيا ايه
هى : وانا كمان طول اليوم مامى بتقولى مالك يا شيروت على بالى علطول
هو : بحبك
هى : بموت فيك
هو : حبيبتى احنا هنفضل صوت كده بس
هى : مش فاهمة يعنى تقصد ايه ( وهى طبعا فاهمة بس بتستهبل )
هو: انا نفسى اشوفك نفسى نبقى مع بعض اكيد هيبقى الموضوع حاجة تانية خالص غير الموبايل
هى : بس انا عمرى ما عملت كده ابدا اشوف حد غريب كده معرفهوش ( طبعا بتشتغله وطبعا هو فاهم )
هو : شيروت انا غريب ! اومال ازاى بتقولى انك بتحبينى ( الراجل فاهم بيعمل ايه كويس وكل شىء مدروس )
هى : اخص عليك طبعا بحبك بس انا خايفة
هو : بصى هتجى تقابلينى حتى عشر دقايق ولو اضايقتى يا ستى امشى
هى : طب افكر
هو : قدامك دقيقة
هى : انت غتت .. طب موافقة
هو : خلاص بكرة الساعة 7 فى كافية ...... اللى فى الزمالك عارفاه
هى : فين ده انا معرفش حاجة خالص ( وهى تعرف القرد مخبى ابنه فين )
هو : ................... ...... ( بيوصفلها المكان )
هى : خلاص خلاص عرفته
هى : حبيبى هتبقى لابس ايه
هو : حبيبتى مش مهم هنبقى على رنة موبايل وهتعرفينى
هى : طب اوصفلى شكلك ( يا مصيبتى السودااااااا انتى حبتيه من غير ما تعرفى حتى شكله )
هو : ههه كل الناس بتقولى انى شبه احمد عز بس انا بسترخمه اوى ( جر رجل )
هى : يلهوى ده قمر انت شبهه
هو : اه يعنى عادى الراجل مش بشكله ( بردو بيعمل حساب لما تشوفه )
.هو : خلاص يا حبيبتى اتفقنا ( عاوز يقلبها عشان يروح يعمل حاجات تانية )
هى : اه حبيبى
هو : اوعدينى انك تفكرى فيا قبل ما تنامى حتى عشر دقايق
هى : ( انت قديم اوى يا مذ مبقاش فيه حد يقول كده ) بس انا لو فكرت فيك مش هنام يا روحى
شوية ملل من هذا التوع ..... وانتهت المكالمة
__________________________________________________
انتظرونا فى الجزء التالت والاخير من الحب فى زمن التوك توك