الأول سمكة التونه فيها نوعين نوع لحمها أبيض و دي وزنها تقريبا كيلو أو أقل
النوع التاني لحمها أحمر ودي وزنها 2 كيلو ونص أو أكتر
المكونات
* سمكة تونه وزن 3 كيلو تقريبا أو علي حسب رغبتك
*خل _ ليمون - دقيق للتنضيف - ملح - كمون - فلفل أسود - مستكه - حبهان - ورق لورا - قرن فلفل عادي أو حار حسب رغبتك - 3 معالق زيت ذره
أنا جبت سمكه وزنها 3 كيلو وربع تقريبا يعني لحمها أحمر وعملتها بالطريقه دي
1- نضفتها من بره زي السمك المقلي بالظبط يعني قصيت الديل والزعانف و قطعت الراس كلها ورميتها وفتحت البطن ورميت اللي فيها كله وغسلتها تحت المياه
2- الوزن ده بتقطعيها 4 أجزاء ونقعتها بشوية خل حوالي ربع كوبايه وليمونه وشوية دقيق وسبتها حوالي ساعه ونص
3- بعد ما نقعتها فركتها بالراحه بإيدي كده في نفس الخلطه المنقوعه فيها
4- طلعتها من المياه دي وغسلتها كويس جدا تحت الحنفيه
5- هتجيبي الحله اللي هتطبخيها فيها وأنا عملتها في حله صاج كبيره
6- بترصي قطع التوته واقفه
7- نحط عليها مياه بس متكتريش المياه يعني بتسيبي ربع القطع تقريبا ظاهره
8- نحط ربع كوباية خل - 3 معالق زيت ذره - معلقة ملح - كمون - فلفل أسود - قرن فلفل عادي أو حار - مستكه – حبهان – ورق لورا
9- تيسبي النار عاليه لغاية ما تغلي وبعدين تهدي النار خالص وكأنك بتطبخي رز وتسيبيها حوالي 4 ساعات وممكن أكتر شويه
10- بعد ما تستوي بتبرديها وتشيلي الجلد بتاعها وتشيلي الشوك منها وتحطيها في التلاجه وتطلعي منها قبل ما تحتاجيها ب 10 دقايق كده علشان تبرد ولو بتحبي تحطي توابل بقي وانتي بتقدميها
وألف هنا وشفا
